ប្រធានាធិបតីបារាំង លោក Emmanuel Macron នៅថ្ងៃសុក្រ (ទី៥ ខែធ្នូ) នេះ បានលើកឡើងថា ការរួបរួម រវាងអឺរ៉ុប និងសហរដ្ឋអាមេរិក គឺជាគន្លឹះដ៏សំខាន់ ក្នុងការគាំទ្រដល់អ៊ុយក្រែន ដោយលោកបានបន្ថែមថា មិនមានការមិនទុកចិត្តគ្នានោះឡើយ ហើយបដិសេធរបាយការណ៍ដែលអះអាងថា លោកបានព្រមានថា ទីក្រុងវ៉ាស៊ីនតោនអាចមិនស្មោះត្រង់ជាមួយអ៊ុយក្រែន។

ក្នុងអំឡុងដំណើរទស្សនកិច្ច នៅប្រទេសចិន លោក Macron បានប្រាប់អ្នកសារព័ត៌មានថា៖ «ការរួបរួម រវាងអាមេរិក និងអឺរ៉ុប ជុំវិញបញ្ហាអ៊ុយក្រែន គឺចាំបាច់ណាស់។ ហើយខ្ញុំនិយាយម្តងហើយម្តងទៀតថា យើងត្រូវធ្វើការជាមួយគ្នា»។

ជាមួយគ្នានេះ លោកបានបន្ថែមថា៖ «យើងស្វាគមន៍ និងគាំទ្រកិច្ចខិតខំប្រឹងប្រែងសន្តិភាព ដែលត្រូវបានធ្វើឡើងដោយសហរដ្ឋអាមេរិក។ សហរដ្ឋអាមេរិកត្រូវការអឺរ៉ុប ដើម្បីដឹកនាំផ្លូវកិច្ចប្រឹងប្រែងសន្តិភាពទាំងនេះ»។

ទស្សនាវដ្ដីអាល្លឺម៉ង់ Spiegel កាលពីថ្ងៃព្រហស្បតិ៍ បានដកស្រង់អត្ថបទនៃការជជែកតាមទូរសព្ទសម្ងាត់ដែលបង្ហាញថា ប្រធានាធិបតីបារាំង និងអធិការបតីអាល្លឺម៉ង់ បានសម្តែងការសង្ស័យយ៉ាងខ្លាំង អំពីកិច្ចខិតខំប្រឹងប្រែងរបស់រដ្ឋាភិបាលសហរដ្ឋអាមេរិក និងបេសកជនរបស់ខ្លួន ក្នុងដំណើរការចរចាសន្តិភាព រវាងអ៊ុយក្រែន និងរុស្ស៊ី។

ហើយនៅពេលត្រូវបានសួរ អំពីរបាយការណ៍របស់ទស្សនាវដ្ដី Spiegel នេះ លោក Macron បានឆ្លើយតបថា៖ «ខ្ញុំសូមបដិសេធគ្រប់យ៉ាង។ យើងត្រូវការសហរដ្ឋអាមេរិក សម្រាប់សន្តិភាព។ សហរដ្ឋអាមេរិកត្រូវការយើង ដើម្បីឲ្យសន្តិភាពនេះស្ថិតស្ថេរ និងរឹងមាំ»៕