មន្ត្រីមកពីប្រទេសទាំងពីរបាននិយាយថា ប៉ាគីស្ថាននិងអាហ្វហ្គានីស្ថាន បានបាញ់តគ្នាយ៉ាងខ្លាំងនៅតាមបណ្តោយព្រំដែនរបស់ប្រទេសកាលពីយប់ថ្ងៃសុក្រ ក្នុងពេលមានភាពតានតឹងកើនឡើងបន្ទាប់ពីការចរចាសន្តិភាពបរាជ័យកាលពីដើមសប្តាហ៍នេះ។ ពុំមានរបាយការណ៍ភ្លាមៗអំពីអ្នកស្លាប់និងរងរបួសនោះទេ។

អ្នកនាំពាក្យក្រុមតាលីបង់អាហ្វហ្គានីស្ថាន លោក Zabihullah Mujahid បាននិយាយថា កងកម្លាំងប៉ាគីស្ថាន បានបើកការវាយប្រហារនៅក្នុងស្រុក Spin Boldak ខេត្ត Kandahar។ អ្នកនាំពាក្យរបស់នាយករដ្ឋមន្ត្រីប៉ាគីស្ថាន បានចោទប្រកាន់កងកម្លាំងអាហ្វហ្គានីស្ថានថា បាន «បាញ់ប្រាហារដោយគ្មានហេតុផល» នៅតាមបណ្តោយព្រំដែន Chaman។

អ្នកនាំពាក្យ លោក Mosharraf Zaidi បាននិយាយក្នុងសេចក្តីថ្លែងការណ៍ថា «ប៉ាគីស្ថាននៅតែមានការប្រុងប្រយ័ត្នយ៉ាងខ្ពស់ និងប្តេជ្ញាធានាបូរណភាពទឹកដី និងសុវត្ថិភាពប្រជាជនរបស់យើង»។ 

ចំណាត់ការនេះបានកើតឡើងរយៈពេលពីរថ្ងៃបន្ទាប់ពីការចរចាសន្តិភាពជុំថ្មីរវាងប្រទេសជិតខាងអាស៊ីខាងត្បូងទាំងពីរបានបញ្ចប់ដោយគ្មានការទម្លាយភាពទាល់ច្រក ទោះបីជាភាគីទាំងពីរបានព្រមព្រៀងបន្តបទឈប់បាញ់ដ៏ផុយស្រួយរបស់ខ្លួនក៏ដោយ។

ការចរចានៅប្រទេសអារ៉ាប៊ីសាអ៊ូឌីតកាលពីចុងសប្តាហ៍មុន គឺជាកិច្ចប្រជុំចុងក្រោយក្នុងចំណោមកិច្ចប្រជុំជាបន្តបន្ទាប់រៀបចំដោយប្រទេសកាតា ទួរគី និងប្រទេសអារ៉ាប៊ីសាអ៊ូឌីត ក្នុងគោលបំណងបន្ធូរបន្ថយភាពតានតឹង ក្រោយការប៉ះទង្គិចគ្នាដ៏បង្ហូរឈាមនៅព្រំដែនកាលពីខែតុលា។