ប្រធានាធិបតីរុស្ស៊ី លោក Vladimir Putin និងនាយករដ្ឋមន្ត្រីឥណ្ឌា លោក Narendra Modi បានព្រមព្រៀងគ្នាកាលពីថ្ងៃសុក្រ ៥ ធ្នូសប្ដាហ៍នេះ ដើម្បីពង្រីក និងបង្កើនទំហំពាណិជ្ជកម្មលើសពីប្រេង និងការពារជាតិ ទោះបីជាមានសម្ពាធពីលោកខាងលិចលើទីក្រុង New Delhi ដើម្បីកាត់បន្ថយទំនាក់ទំនងជិតស្និទ្ធរាប់ទសវត្សរ៍របស់ខ្លួនជាមួយទីក្រុងមូស្គូក៏ដោយ។   

ឥណ្ឌា ដែលជាប្រទេសទិញអាវុធ និងប្រេង របស់រុស្ស៊ីច្រើនជាងគេបំផុតលើពិភពលោក បានក្រាលកម្រាលព្រំក្រហមសម្រាប់លោក Putin ក្នុងដំណើរទស្សនកិច្ចរយៈពេលពីរថ្ងៃរបស់លោក ដែលជាលើកដំបូងរបស់លោកទៅកាន់ទីក្រុង New Delhi ចាប់តាំងពីការឈ្លានពានរបស់រុស្ស៊ីលើអ៊ុយក្រែនក្នុងឆ្នាំ ២០២២មក។  

ដំណើរទស្សនកិច្ចនេះ ស្របពេលជាមួយនឹងការចរចារបស់ទីក្រុង New Delhi ជាមួយសហរដ្ឋអាមេរិក លើកិច្ចព្រមព្រៀងពាណិជ្ជកម្ម ដើម្បីកាត់បន្ថយអត្រាពន្ធដែលដាក់ដោយប្រធានាធិបតី Donald Trump លើទំនិញរបស់ខ្លួន ជុំវិញការទិញប្រេងរបស់រុស្ស៊ីពីសំណាក់ឥណ្ឌា។  

រុស្ស៊ីបាននិយាយថា ខ្លួនចង់នាំចូលទំនិញឥណ្ឌាបន្ថែមទៀត ក្នុងកិច្ចខិតខំប្រឹងប្រែងដើម្បីបង្កើនពាណិជ្ជកម្មដល់ ១០០ ពាន់លានដុល្លារនៅឆ្នាំ ២០៣០។ 

លោក Putin បាននិយាយថា រុស្ស៊ីនឹងបន្តធានា ការផ្គត់ផ្គង់ប្រេងឥន្ធនៈដោយគ្មានការរំខាន ដល់ប្រទេសឥណ្ឌា ដែលបង្ហាញពីជំហររឹងរូសមួយនៅចំពោះមុខទណ្ឌកម្មរបស់សហរដ្ឋអាមេរិក៕