នៅថ្ងៃទី៦ ខែធ្នូ ឆ្នាំ២០២៥ ឯកឧត្តម សាយ សំអាល់ ឧបនាយករដ្ឋមន្ត្រី រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តព្រះសីហនុ បានដឹកនាំក្រុមការងារ ចុះពិនិត្យវឌ្ឍនភាព នៃដំណើការសាងសង់ពហុកីឡដ្ឋានថ្មី នៅភូមិចំណោតរាម សង្កាត់បិតត្រាំង ក្រុងកំពង់សោម ខេត្តព្រះសីហនុ។

ក្នុថឱកាសនោះ ឯកឧត្តម សាយ សំអាល់ បានថ្លែងថា ពហុកីឡដ្ឋានថ្មីនេះ សាងសង់ឡើងលើផ្ទៃដីជាង ៣០ហិកតា អាចផ្ទុកមនុស្ស ៣១.៥០០នាក់។ ការសាងសង់ពហុកីឡដ្ឋាន គឺឆ្លើយតបតាមសំណូមពររបស់ប្រជាពលរដ្ឋ និងតម្រូវការចាំបាច់ក្នុងការអភិវឌ្ឍវិស័យកីឡា និងទេសចរណ៍ក្នុងខេត្តឱ្យកាន់តែរីកចម្រើនថែមទៀត ដែលនឹងរួមចំណែកទាក់ទាញភ្ញៀវទេសចរជាតិ និងអន្តរជាតិឱ្យចូលមកទស្សនាកម្សាន្តក្នុងខេត្តនេះព្រមទាំងបណ្ដាខេត្តជាប់ឆ្នេរសមុទ្រ។

ឯកឧត្តមបានបន្តថា ការសាងសង់ពហុកីឡដ្ឋានថ្មីនេះ ក៏មានបញ្ចូលនូវអគារសារមន្ទីរ សួនទេសចរណ៍ សាលមហោស្រព និងកន្លែងបោះតង់ ព្រមទាំងនឹងអនុវត្តតាមរចនាបថសហសម័យ ដោយធានាបាននូវគុណភាពខ្ពស់ និងអត្តសញ្ញាណជាតិខ្មែរ។ ហើយនេះក៏គឺជាការតាក់តែងកោសិកាមួយក្នុងចំណោមកោសិកាជាច្រើនផ្សេងទៀតដែលយើងត្រូវរៀបចំសម្រាប់ខេត្តព្រះសីហនុនាយុគសម័យនេះ។

ឯកឧត្ដម បន្ដថា ខេត្ដព្រះសីហនុជាខេត្តទីមួយដែលទទួលបាននូវផ្លូវល្បឿនលឿនមុនគេក្នុងប្រទេសកម្ពុជា ជាឱកាសក្នុងការចូលរួមជំរុញសេដ្ឋកិច្ច និងជីវភាពរស់នៅរបស់ប្រជាពលរដ្ឋ។ ចំពោះទឹកស្អាត ភ្លើងយខេត្តមានគ្រប់គ្រាន់ យើងកំពុងគិតគូរតភ្ជាប់ទឹកស្អាតមកពីខេត្តកំពតបន្តទៀ៕