ភ្នំពេញ៖ ឯកឧត្តម ហ៊ុន ម៉ានី ឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈ នៅ​ព្រឹក​ថ្ងៃ​ទី៨​ ខែធ្នូ ឆ្នាំ២០២៥នេះ បានបង្ហោះសារក្ដុកក្ដួល អាណិតអាសូរ​ដល់ប្រជាពលរដ្ឋ​កម្ពុជា​នៅ​ជាប់​ព្រំដែន​ថៃ ក្រោយពីស​ន្តិភាព​កម្ពុជា​ត្រូវ​បានបំ​ផ្លាញ​ជា​ថ្មី​ម្តង​ទៀត​ដោយ​ការ​ឈ្លាន​ពាន​របស់​យោធា​ថៃ​តាំ​ង​ពី​រសៀលថ្ងៃទី៧ មកដល់ព្រឹកថ្ងៃទី៨ ខែធ្នូ ឆ្នាំ២០២៥នេះ។

ឯកឧត្តម ហ៊ុន ម៉ានី បានសរសេរថា នៅព្រឹកថ្ងៃទី៨ ខែធ្នូ សន្តិភាព​កម្ពុជា​ត្រូវ​បាន​បំផ្លាញ​ជា​ថ្មីម្ត​ង​ទៀត​ ជាពិសេសចាប់តាំងពីព្រឹត្តិការណ៍នៃ «សេចក្តីថ្លែងការណ៍រួម» ដែល​បាន​ចុះ​ហត្ថ​លេខា​នៅ​ថ្ងៃ​ទី​២៦ ខែតុលា នៅទីក្រុងគូឡាឡាំពួ ក្រោមវត្តមានរបស់ប្រធានាធិបតី Trump, នាយករដ្ឋមន្ត្រី Anwar Ibrahim រួមជាមួយនឹងសម្តេចនាយករដ្ឋមន្រ្តី ហ៊ុន ម៉ាណែត និងនាយករដ្ឋមន្រ្តី Anutin Charnvirakul ។

ឯកឧត្តមថ្លែងថា ម្តងទៀត ថ្ងៃនេះ សំឡេងកាំភ្លើង អាវុធធុនធ្ងន់ និងកាំភ្លើងធំ បាន​ផ្ទុះ​ឡើង​ដែល​បង្កើត​ការ​ភ័យខ្លាចក្នុងចំណោមប្រជាជនយើង។ រូបភាពប្រជាជនយើង និងជា​ពិសេស​កូន​សិស្ស​សាលា​របស់​យើង ដែលទើបតែមកដល់សាលា ត្រូវរត់ទាំងភ័យស្លន់​ស្លោ​ដោយ​សារ​ហេតុ​ការណ៍ដ៏​គ្រោះថ្នាក់​នេះ​។

ឯកឧត្តមថ្លែងថា៖«ឱប្រជាជនខ្មែរយើងអើយ តើមានពាក្យអ្វី ក្រៅពីភាពក្តុកក្តួល និងទឹកភ្នែក សម្រា​​ប់​​ស្ថានភាពនេះ»។

ឯកឧត្តម ហ៊ុន ម៉ានី បានបញ្ជាក់ថា អ្វីដែលកម្ពុជាចង់បាន គឺសន្តិភាព ដែលយើង​តែង​ប្រកាន់​យក​យ៉ាង​ខ្ចាប់ខ្ជួន និងអស់ពីចិត្ត។ យើងបានរក្សាជំហរស្មោះត្រង់ ក្នុងការជ្រើស​រើស​យក​នូវ​ដោះ​ស្រាយ​ជម្លោះ​ព្រំដែន ដោយមិត្តភាព មិនមែនតាមមធ្យោបាយយោធា និងដោយ​យើង​ថែ​រក្សា​សិទ្ធិ​ក្នុង​ការ​ប្រើ​ប្រាស់មធ្យោបាយយោធា ក្នុងការការពារខ្លួនតែប៉ុណ្ណោះ។

ឯកឧត្តមថ្លែងថា៖«ពេលនេះ ម៉ោងនេះ ស្មារតី ទឹកចិត្ត ទំនុកចិត្ត ភាពជឿជាក់ និង​សំឡេង​របស់​ប្រជាជន​ខ្មែរ​គ្រប់រូប គឺស្ថិតនៅជាមួយវីរៈកងទ័ព មិនថានៅក្នុងកាលៈទេសៈណាឡើយ»៕