ក្រុមអាជ្ញាធរអូស្ត្រាលី បាននិយាយនៅថ្ងៃចន្ទ (៨ ធ្នូ) នេះថា អ្នកពន្លត់អគ្គិភ័យម្នាក់ បានស្លាប់នៅក្នុងប្រតិបត្តិការ បន្ទាប់ពីដើមឈើរលំសង្កត់ក្នុងពេលព្យាយាមគ្រប់គ្រងចំហេះព្រៃ ដែលបានដុតបំផ្លាញផ្ទះសម្បែង និងបានឆាបឆេះព្រៃជាច្រើននៅភាគខាងជើងនៃទីក្រុងស៊ីដនី ព្រមទាំងបង្កការបំផ្លិចបំផ្លាញយ៉ាងទូលំទូលាយក្នុងរដ្ឋចំនួនពីររបស់អូស្រ្តាលី។

ក្រុមសង្គ្រោះបន្ទាន់បានប្រញាប់ប្រញាល់ទៅកាន់តំបន់ព្រៃក្បែរទីប្រជុំជនជនបទ Bulahdelah ចម្ងាយ ២០០គីឡូម៉ែត្រ ភាគខាងជើងនៃទីក្រុងស៊ីដនី បន្ទាប់ពីមានសេចក្តីរាយការណ៍ថា ដើមឈើបានដួលរលំសង្កត់លើបុរសម្នាក់។ ក្រុមមន្ត្រីបាននិយាយថា បុរសវ័យ ៥៩ឆ្នាំ ដែលជាអ្នកពន្លត់អគ្គិភ័យរូបនោះ បានគាំងបេះដូងស្លាប់នៅនឹងកន្លែង។

ចំហេះព្រៃជាង ៥០កន្លែង កំពុងឆាបឆេះនៅទូទាំងរដ្ឋ New South Wales គិតត្រឹមព្រឹកថ្ងៃចន្ទនេះ។ អណ្តាតភ្លើងដែលរាលដាលយ៉ាងលឿនកាលពីចុងសប្ដាហ៍កន្លងទៅ បានបំផ្លាញលំនៅឋានយ៉ាងតិច ១៦ខ្នង ក្នុងតំបន់ឆ្នេរកណ្ដាលរបស់រដ្ឋ ដែលមានប្រជាជនប្រហែល ៣៥ម៉ឺននាក់រស់នៅ និងតំបន់ធ្វើដំណើរដ៏សំខាន់មួយនៅភាគខាងជើងនៃទីក្រុងស៊ីដនី។

នៅលើរដ្ឋកោះ Tasmania ចំហេះព្រៃទំហំ ៧០០ហិកតា នៅតំបន់ Dolphin Sands ចម្ងាយប្រហែល ១៥០គីឡូម៉ែត្រ ភាគឦសាននៃទីក្រុង Hobart បានបំផ្លាញផ្ទះសម្បែងយ៉ាងតិច ១៩ខ្នង និងបង្កការខូចខាតចំនួន ៤០ខ្នង។ ក្រុមមន្ត្រីនិយាយថា ចំហេះនៅទីនោះបានរលត់ហើយ ប៉ុន្តែអ្នកស្រុកត្រូវបានព្រមានកុំឱ្យត្រឡប់ទៅវិញ ដោយសារស្ថានភាពនៅតែមានគ្រោះថ្នាក់៕