ប្រធានាធិបតីបារាំង លោក អេម៉ានុយអែល ម៉ាក្រុង (Emmanuel Macron) បាននិយាយកាលពីថ្ងៃអាទិត្យថា ប្រទេសបារាំង នឹងបង្កើនកិច្ចសហប្រតិបត្តិការជាមួយប្រទេសនីហ្សេរីយ៉ា បន្ទាប់ពីបាននិយាយជាមួយសមភាគីរបស់លោក ខណៈដែលប្រទេសអាហ្វ្រិកខាងលិច កំពុងប្រឈមនឹងការកើនឡើងនៃអំពើចាប់ជំរិត។

ប្រទេសនីហ្សេរីយ៉ាត្រូវបានវាយប្រហារដោយរលកនៃការចាប់ជំរិត ក្នុងរយៈពេលប៉ុន្មានសប្តាហ៍ថ្មីៗនេះ រួមទាំងការចាប់ខ្លួនក្មេងសិស្សសាលាជាង ៣០០នាក់ កាលពីពីរសប្តាហ៍កន្លងទៅ ដែលបានធ្វើឲ្យ ប្រទេសដែលមានប្រជាជនច្រើនបំផុតរបស់ទ្វីបអាហ្វ្រិកដែលរួបរឹតដោយអំពើហិង្សារ៉ាំរ៉ៃរួចហើយនោះ មានការ រង្គោះរង្គើ។

លោក Macron បានសរសេរនៅលើបណ្តាញសង្គម X ថា ការសម្រេចនេះ បានធ្វើឡើង តាមការស្នើសុំរបស់ប្រធានាធិបតីនីហ្សេរីយ៉ា លោក Bola Tinubu ដោយនិយាយថា ប្រទេសបារាំង «នឹងពង្រឹងភាពជាដៃគូរបស់យើងជាមួយអាជ្ញាធរ និងការគាំទ្ររបស់យើងចំពោះប្រជាជនដែលរងផលប៉ះពាល់» ខណៈពេលដែលជំរុញឲ្យប្រទេសដទៃទៀត «បង្កើនការចូលរួមរបស់ពួកគេ»។

លោក ប្រធានាធិបតីបារាំងបាននិយាយថា៖«គ្មាននរណាម្នាក់ អាចនៅឈរមើល»អ្វីដែលកំពុងកើតឡើង នៅក្នុងប្រទេសនីហ្សេរីយ៉ានោះទេ។

ប្រទេសនីហ្សេរីយ៉ាបានទាក់ទាញការចាប់អារម្មណ៍កាន់តែខ្លាំងឡើងពីទីក្រុងវ៉ាស៊ីនតោន ក្នុងរយៈពេលប៉ុន្មានសប្តាហ៍ថ្មីៗនេះ បន្ទាប់ពីប្រធានាធិបតីអាមេរិក លោក ដូណាល់ ត្រាំ (Donald Trump) បាននិយាយកាលពីខែវិច្ឆិកាថា សហរដ្ឋអាមេរិកបានត្រៀមខ្លួនរួចជាស្រេច ដើម្បីចាត់វិធានការយោធា នៅទីនោះ ដើម្បីប្រឆាំងនឹងការសម្លាប់គ្រិស្តបរិស័ទ៕