ការនាំចេញរ៉ែកម្រដ៏សំខាន់របស់ប្រទេសចិន បានកើនឡើងយ៉ាងខ្លាំងនៅក្នុងខែវិច្ឆិកា កន្លងទៅ ដែលជារយៈពេលមួយខែពេញ បន្ទាប់ពីប្រធានាធិបតីចិន លោក Xi Jinping និងប្រធានាធិបតីអាមេរិក លោក Donald Trump បានឯកភាពនៅក្នុងកិច្ចប្រជុំកំពូលនៅកូរ៉េខាងត្បូង ក្នុងការពន្លឿនការដឹកជញ្ជូនរ៉ែសំខាន់ៗនេះពីប្រទេសចិន ដែលជាប្រភពធំជាងគេបំផុតរបស់ពិភពលោក។

តួលេខពីរដ្ឋបាលគយចិន បានបង្ហាញថា ការនាំចេញក្នុងខែវិច្ឆិកា បានកើនឡើងជាលើកទីពីរជាប់ៗគ្នា ក្នុងអត្រា ២៦,៥% ពីខែតុលា ដល់ចំនួន ៥.៤៩៣,៩ តោន។ កំណើនជាក់លាក់នៃការដឹកជញ្ជូនទៅកាន់សហរដ្ឋអាមេរិក ឬអឺរ៉ុប នឹងត្រូវបានបង្ហាញនៅថ្ងៃទី២០ ខែធ្នូ នៅពេលការិយាល័យគយចិន ចេញផ្សាយទិន្នន័យលម្អិតតាមប្រទេស។

ការគ្រប់គ្រងការនាំចេញរបស់ប្រទេសចិន លើសារធាតុរ៉ែកម្រចំនួន ១៧ប្រភេទ ដែលប្រើប្រាស់ក្នុងវិស័យផ្សេងៗគ្នាដូចជា រថយន្ត គ្រឿងអេឡិចត្រូនិកប្រើប្រាស់ និងវិស័យការពារជាតិជាដើម បានបង្កឱ្យមានការរំខានជាច្រើនខែ ចាប់តាំងពីខែមេសាមក។

តម្រូវការអាជ្ញាបណ្ណសម្រាប់ការនាំចេញរ៉ែនីមួយៗនេះ បានផ្តល់ឱ្យចិន នូវឥទ្ធិពលយ៉ាងខ្លាំងនៅក្នុងការចរចាពាណិជ្ជកម្មជាមួយសហរដ្ឋអាមេរិក។ កាលពីសប្តាហ៍មុន សារព័ត៌មានរ៉យទ័របានរាយការណ៍ថា ចិន បានចេញ "អាជ្ញាបណ្ណទូទៅ" ដំបូងរបស់ខ្លួន ពោលគឺ លិខិតអនុញ្ញាតរយៈពេល ១ឆ្នាំ ដែលមានបំណងបង្កើនល្បឿននាំចេញ បន្ទាប់ពីកិច្ចប្រជុំកំពូលលោក Xi និងលោក Trump៕