រុស្ស៊ី បានអះអាងកាលពីថ្ងៃអាទិត្យថា ខ្លួនបានបន្តហ៊ុមព័ទ្ធកងទ័ពអ៊ុយក្រែន ខណៈអ៊ុយក្រែននៅថ្ងៃដដែលនោះ បាននិយាយថា ខ្លួនកំពុងគ្រប់គ្រងខ្សែការពាររបស់ខ្លួន។ 

ក្រសួងការពារជាតិរុស្ស៊ី បាននិយាយនៅក្នុងរបាយការណ៍ចុងក្រោយថា កងកម្លាំងរុស្ស៊ីបានគ្រប់គ្រងទីតាំងលំនៅឋានចំនួន២កន្លែងបន្ថែមទៀតនៅក្នុងតំបន់ Kharkov និង Donetsk ក្នុងរយៈពេលមួយថ្ងៃកន្លងទៅនេះ។

កាលពីព្រឹកថ្ងៃអាទិត្យ កងទ័ពរុស្ស៊ី បានបើកការវាយប្រហារទៅលើហេដ្ឋារចនាសម្ព័ន្ធដឹកជញ្ជូនរបស់អ៊ុយក្រែន ដោយប្រើប្រាស់អាវុធស៊ីបគោលដៅ រួមមានទាំងមីស៊ីលKinzhal និងយានដ្រូន។

កងកម្លាំងរុស្ស៊ីបាននិយាយថា ពួកគេបានបន្តហ៊ុមព័ទ្ធកងទ័ពអ៊ុយក្រែននៅក្នុងទីតាំងលំនៅឋាន Dimitrov ក្នុងតំបន់ Donetsk ខណៈកំពុងបោសសម្អាតកងកម្លាំងអ៊ុយក្រែនចេញពីទីតាំងលំនៅ Grishino។ កងទ័ពរុស្ស៊ី ក៏បានវាយប្រហារហេដ្ឋារចនាសម្ព័ន្ធយោធាអ៊ុយក្រែនផងដែរ រួមទាំងអាកាសយានដ្ឋានយោធា និងឃ្លាំងប្រេងឥន្ធនៈ។

ច្រករបៀងដឹកជញ្ជូនបន្ថែមទៀត បច្ចុប្បន្នកំពុងត្រូវបានបង្កើតឡើងសម្រាប់កងទ័ពអ៊ុយក្រែននៅក្នុងទីក្រុង Pokrovsk និងទីក្រុង Myrnohrad ដើម្បីធានាការដឹកជញ្ជូនសម្ភារៈចាំបាច់ជាបន្តបន្ទាប់។