ភាពអន្ទះអន្ទែង បានមានកាន់តែខ្លាំងឡើងៗ នៅក្នុងប្រទេសហុងឌូរ៉ាស នៅថ្ងៃអាទិត្យ (ទី៧ ខែធ្នូ) ដោយសារមន្ត្រីរៀបចំការបោះឆ្នោត មិនអាចផ្តល់ព័ត៌មានថ្មីៗ អំពីលទ្ធផលនៃការបោះឆ្នោតជាតិ កាលពីថ្ងៃទី៣០ ខែវិច្ឆិកា អស់រយៈពេលជាង ៤៨ម៉ោងមកហើយ ដោយអ្នកឈ្នះការប្រកួតប្រជែងដណ្ដើមតំណែងប្រធានាធិបតី នៅតែមិនទាន់ឃើញកៀកនឹងការប្រកាសសោះ។

សម្រាប់លទ្ធផលចុងក្រោយដែលត្រូវបានចេញផ្សាយកាលពីថ្ងៃសុក្រ លោក Nasry Asfura របស់គណបក្សជាតិ បាននាំមុខដោយសំឡេង ៤០ភាគរយ ដោយមានសន្លឹកឆ្នោតនាំមុខមិនដល់ ២០.០០០សន្លឹកនោះឡើយ លើគូប្រជែងកណ្តាលនិយម គឺលោក Salvador Nasralla របស់គណបក្សសេរីនិយមដែលទទួលបានសំឡេងគាំទ្រ ៣៩,៤៩ភាគរយ ដោយសន្លឹកឆ្នោតរាប់បាន ៨៨ភាគរយ។ ចំណែកលោកស្រី Rixi Moncada របស់គណបក្សឆ្វេងនិយម Libre ដែលកំពុងកាន់អំណាច បានតាមពីក្រោយដាច់ឆ្ងាយជាមួយនឹងសំឡេង ១៩,៣០ភាគរយ។ មន្ត្រីបានប្រាប់ថា សន្លឹកឆ្នោតប្រមាណជា ១៤ភាគរយ បង្ហាញពីភាពមិនស្របគ្នា ហើយនឹងត្រូវពិនិត្យឡើង។

មិនមានការធ្វើបច្ចុប្បន្នភាព អំពីលទ្ធផលទាំងនេះទេ កាលពីចុងសប្តាហ៍ ដោយកំពុងសាកល្បងភាពអត់ធ្មត់របស់ប្រជាជន ខណៈដែលអាណត្តិរបស់ប្រធានាធិបតីកំពុងស្ថិតក្នុងភាពមិនច្បាស់លាស់។

ទន្តបណ្ឌិតដែលបានបោះឆ្នោតនៅ Siguatepeque ជាទីក្រុងតូចមួយ នៅកណ្តាលប្រទេសហុងឌូរ៉ាស គឺលោក Gabriela Osorio បាននិយាយថា៖ «វាគឺរឿងគួរឲ្យសោកស្តាយណាស់។ ការរាប់សន្លឹកឆ្នោតមិនមានការប្រែប្រួលឡើយ នៅប៉ុន្មានថ្ងៃនេះ ហើយឥឡូវនេះ គឺរយៈពេលមួយសប្តាហ៍ហើយ គិតចាប់តាំងពីការបោះឆ្នោតមក ហើយយើងនៅតែមិនដឹងអ្វីសោះ»។

កាលពីថ្ងៃអាទិត្យ លោកស្រី Moncada បានទាមទារឲ្យលុបចោលការបោះឆ្នោត ហើយបាននិយាយថា គណបក្សកំពុងអំពាវនាវឲ្យអ្នកគាំទ្ររបស់ខ្លួនចូលរួមក្នុងការហែរក្បួន កូដកម្ម និងអង្គុយតវ៉ា ដើម្បីប្រឆាំងនឹងអ្វីដែលលោកស្រីចាត់ទុកថា ជាការក្លែងបន្លំការបោះឆ្នោត៕