អ៊ុយក្រែន៖ សមាជិកសភាអ៊ុយក្រែនបានអនុម័តការដាក់រដ្ឋក្នុងគ្រាអាសន្នទូទាំងប្រទេស ក្នុងពេលមានការព្រួយបារម្ភពីការឈ្លានពានរបស់រុស្ស៊ី។ សភារបស់ប្រទេសបានអនុម័តក្រឹត្យនេះកាលពីថ្ងៃពុធ ដែលកាលពីដំបូងត្រូវបានស្នើឡើងដោយប្រធានាធិបតីលោក Volodymyr Zelenskyy។
ការដាក់រដ្ឋក្នុងគ្រាអាសន្នទូទាំងប្រទេសបានចូលជាធរមាននៅថ្ងៃព្រហស្បតិ៍នេះ ហើយនឹងមានរយៈពេល ៣០ថ្ងៃ។ វិធានការនេះនឹងអនុញ្ញាតឱ្យអាជ្ញាធរដាក់ការរឹតត្បិតការធ្វើដំណើរ រារាំងការជួបជុំ និងដាក់បម្រាមលើគណបក្សនយោបាយ និងអង្គការនានា។ លោក Oleksiy Danilov រដ្ឋមន្ត្រីសន្តិសុខ និងការពារជាតិអ៊ុយក្រែនបាននិយាយកាលពីថ្ងៃពុធថា យោងតាមក្រុមអ្នកវិភាគរបស់ប្រទេសបានលើកឡើងថា ការដណ្ដើមយកប្រទេសគឺមិនអាចទៅរួចនោះទេ បើគ្មានអស្ថិរភាពផ្ទៃក្នុងកើតឡើង។ វិធានការនេះធ្វើឡើងបន្ទាប់ពីប្រធានាធិបតីរុស្ស៊ីលោក Vladimir Putin កាលពីថ្ងៃចន្ទទទួលស្គាល់ឯករាជ្យភាពតំបន់ក្រុមឧទ្ទាម នៅភាគខាងកើតប្រទេសអ៊ុយក្រែន។ លោក Putin បានដាក់ពង្រាយកងទ័ពរុស្ស៊ីនៅក្នុងតំបន់ក្រុមឧទ្ទាម ដោយមានលេសថារក្សាសន្តិភាព និងបានទទួលការយល់ព្រមពីសភាក្នុងការប្រើប្រាស់កម្លាំងយោធានៅខាងក្រៅប្រទេស។
ប្រជាជនអ៊ុយក្រែនក្នុងរដ្ឋធានីគៀវមានប្រតិកម្មច្រើន ខណៈពួកគេឆ្លើយតបទៅនឹងព័ត៌មានរបស់រដ្ឋាភិបាលពួកគេ ដែលអំពាវនាវដាក់រដ្ឋក្នុងគ្រាអាសន្នកាលពីថ្ងៃពុធ ក្នុងពេលមានការគំរាមកំហែងជម្លោះបន្ថែមទៀតជាមួយរុស្សី។ បន្ទាប់ពីរយៈពេលជាច្រើនសប្តាហ៍នៃការព្យាយាមធ្វើឲ្យស្ថានភាពស្ងប់ស្ងាត់ អាជ្ញាធរអ៊ុយក្រែនបានបង្ហាញសញ្ញាការកើនឡើងការព្រួយបារម្ភ បន្ទាប់ពីប្រធានាធិបតីរុស្សីទទួលស្គាល់ឯករាជ្យភាពតំបន់ផ្តាច់ខ្លួនគាំទ្ររុស្សីនៅអ៊ុយក្រែនភាគខាងកើត ដែលក្រុមគាំទ្ររុស្សីនៅខាងក្នុងប្រទេសអាចព្យាយាមបង្កអស្ថិរភាព រួមទាំងគណបក្សនយោបាយគាំទ្រទីក្រុងមូស្គូដែលតំណាងនៅក្នុងសភា៕
អត្ថបទ៖ ប៊ុនថន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
