សេចក្តីថ្លែងការណ៍ខាងក្រោមចេញផ្សាយនៅថ្ងៃ៨ ខែធ្នូ ឆ្នាំ២០២៥ ដោយអ្នកនាំពាក្យរបស់លោក អាន់តូនីញ៉ូ ហ្គូទែរែស អគ្គលេខាធិការអ.ស.ប.៖

អគ្គលេខាធិការអ.ស.ប. ព្រួយបារម្ភចំពោះរបាយការណ៍ស្តីពីការប៉ះទង្គិចប្រដាប់អាវុធសាជាថ្មីរវាងកម្ពុជា និងថៃ ជាពិសេសការរាយការណ៍អំពីការវាយប្រហារតាមអាកាស និងការចល័តសព្វាវុធធុនធ្ងន់នៅតំបន់ព្រំដែន។ លោកទទូចឱ្យភាគីទាំងពីរសូមធ្វើការអត់ធ្មត់ និងចៀសវាងសកម្មភាពបង្កើនភាពតានតឹងបន្ថែមទៀត។

ជម្លោះព្រំដែនរវាងកម្ពុជា និងថៃ បានបណ្តាលឱ្យជនស៊ីវិលស្លាប់បាត់បង់ជីវិតនិងរងរបួសជាច្រើន ខូចខាតដល់ហេដ្ឋារចនាសម្ព័ន្ធស៊ីវិល និងប្រជាជនផ្លាស់ទីលំនៅទាំងសងខាងព្រំដែន។ អគ្គលេខាធិការសង្កត់ធ្ងន់ថា ភាគីទាំងពីរត្រូវតែការពារជនស៊ីវិល និងសម្របសម្រួលជំនួយមនុស្សធម៌។

អគ្គលេខាធិការអំពាវនាវជាថ្មីឱ្យភាគីនានា វិលត្រលប់ទៅរកក្របខណ្ឌនៃសេចក្តីថ្លែងការណ៍រួម ដែលបានចុះហត្ថលេខានៅទីក្រុងគូឡាឡាំពួរ នៅថ្ងៃទី២៦ ខែតុលា ប្តេជ្ញាចិត្តឡើងវិញចំពោះបទឈប់បាញ់ ហើយអនុវត្តវិធានការកាត់បន្ថយភាពតានតឹង និងកសាងទំនុកចិត្ត។ លោកអំពាវនាវឱ្យភាគីទាំងពីរប្រើប្រាស់យន្តការសន្ទនាទាំងអស់ឱ្យអស់លទ្ធភាព ដើម្បីស្វែងរកដំណោះស្រាយយូរអង្វែង ក្នុងការដោះស្រាយជម្លោះតាមរយៈមធ្យោបាយសន្តិវិធី។

អង្គការសហប្រជាជាតិត្រៀមខ្លួនរួចជាស្រេច ដើម្បីគាំទ្រដល់កិច្ចខិតខំប្រឹងប្រែងនានា សំដៅលើកកម្ពស់សន្តិភាព ស្ថិរភាព និងការអភិវឌ្ឍនៅក្នុងតំបន់។