សារព័ត៌មាន Valor Economico របស់ប្រេស៊ីលដែលដកស្រង់សម្តីទីប្រឹក្សាដែលមិនបញ្ចេញឈ្មោះរបស់ មេដឹកនាំប្រេស៊ីលថា រដ្ឋបាលរបស់ប្រធានាធិបតីប្រេស៊ីល លោក Luis Inacio Lula da Silva កំពុងអំពាវនាវឲ្យរដ្ឋាភិបាលវ៉េណេស៊ុយអេឡាជៀសវាងសកម្មភាពយោធា ដើម្បីឆ្លើយតបទៅនឹងលទ្ធភាពឈ្លានពាន របស់សហរដ្ឋអាមេរិក។ 

លោកបានលើកឡើងថា ប្រេស៊ីលបានព្យាយាមបញ្ចុះបញ្ចូលថ្នាក់ដឹកនាំរបស់វ៉េណេស៊ុយអេឡាឲ្យ «បន្ទន់ការឆ្លើយតបរបស់ពួកគេ» ចំពោះការវាយប្រហារដែលអាចកើតមានរបស់សហរដ្ឋអាមេរិកលើទឹកដីរបស់ប្រទេសនេះ។ អត្ថបទនោះ បានឲ្យដឹងថា ប្រេស៊ីលចង់ជៀសវាងការកើនឡើងភាពតឹងបន្ថែមទៀតនៅក្នុងតំបន់។

ក្នុងពេលជាមួយគ្នានេះ រដ្ឋបាលរបស់លោក Lula da Silva នឹងធ្វើការដើម្បីទប់ស្កាត់ការវាយប្រហាររបស់សហរដ្ឋអាមេរិកមិនឲ្យកើតឡើង ហើយចាត់ទុករឿងនោះ ជាគោលបំណងគោលនយោបាយការបរទេសសំខាន់របស់ខ្លួន នៅពេលនេះ។ មេដឹកនាំប្រេស៊ីលរូបនេះ ជឿជាក់ថា លោកអាចជាអ្នកសម្របសម្រួលក្នុងជម្លោះ។

ទីក្រុងវ៉ាស៊ីនតោនបានចោទប្រកាន់ទីក្រុងការ៉ាកាសថា មិនបានធ្វើអ្វីគ្រប់គ្រាន់ ដើម្បីប្រយុទ្ធប្រឆាំងនឹងការរត់ពន្ធគ្រឿងញៀន ដោយមិនផ្តល់ភស្តុតាងទេ។ យោងតាមកាសែត The New York Times បានឲ្យដឹងថា លោកប្រធានាធិបតី ដូណាល់ ត្រាំ បានអនុញ្ញាតឲ្យ CIA ធ្វើប្រតិបត្តិការសម្ងាត់ នៅក្នុងប្រទេសវ៉េណេស៊ុយអេឡា។ ប្រព័ន្ធផ្សព្វផ្សាយអាមេរិក បានរាយការណ៍ម្តងហើយម្តងទៀតថា ទីក្រុងវ៉ាស៊ីនតោនអាចនឹងចាប់ផ្តើមវាយប្រហារគោលដៅនៅក្នុងប្រទេសវ៉េណេស៊ុយអេឡា ក្នុងពេលឆាប់ៗនេះ៕