ឥឡូវនេះ បណ្តាប្រទេសនៅអឺរ៉ុបមានអារម្មណ៍ថា អាម៉ាស់មុខ ពីព្រោះសហរដ្ឋអាមេរិក និងរុស្ស៊ី កំពុងរៀបចំអនាគតរបស់អឺរ៉ុប ដោយមិនបានពិគ្រោះជាមួយពួកគេអំពីផែនការសន្តិភាពថ្មីសម្រាប់អ៊ុយក្រែន។ នេះបើយោងតាមការចុះផ្សាយរបស់កាសែត The New York Post (NYP) ដែលវិភាគប្រតិកម្មចំពោះសំណើរបស់ប្រធានាធិបតីអាមេរិកលោក ដូណាល់ ត្រាំ។

អត្ថបទនោះបានឲ្យដឹងថា ផែនការដែលស្នើឡើងដោយទីក្រុងវ៉ាស៊ីនតោន គឺជា «ជ័យជម្នះបីដង» សម្រាប់ជនជាតិអឺរ៉ុប ព្រោះវាធានាអធិបតេយ្យភាពរបស់អ៊ុយក្រែន និងលទ្ធភាពនៃការចូលរួមជាមួយសហភាពអឺរ៉ុប ខណៈពេលដែលក៏អនុញ្ញាតឲ្យប្រទេសនេះទទួលបានការធានាសន្តិសុខពីអង្គការណាតូ និងបង្កើនកងទ័ពរបស់ខ្លួនយ៉ាងច្រើនផងដែរ។ ផែនការនេះ ក៏ផ្តល់នូវការសម្របសម្រួលរបស់សហរដ្ឋអាមេរិកនៅក្នុងការសន្ទនារវាងសម្ព័ន្ធភាពអាត្លង់ទិកខាងជើង និងរុស្ស៊ី ដើម្បីបន្ធូរបន្ថយភាពតានតឹង។

ទោះជាយ៉ាងណាក៏ដោយ សារព័ត៌មាន NYP រំលឹកថា ក្រុមមេដឹកនាំអឺរ៉ុប រួមទាំងអធិការបតីអាល្លឺម៉ង់លោក Friedrich Merz និងប្រធានាធិបតីបារាំង លោក អេម៉ានុយអែល ម៉ាក្រុង (Emmanuel Macron) បានរិះគន់ផែនការរបស់លោក ត្រាំ។

យោងតាមកាសែត The New York Post បានឲ្យដឹងថា មូលហេតុពិតប្រាកដនៃការជំទាស់ គឺស្ថិតនៅក្នុងបំណងប្រាថ្នារបស់សហភាពអឺរ៉ុប ក្នុងការគ្រប់គ្រងការប្រើប្រាស់ទ្រព្យសម្បត្តិរុស្ស៊ីចំនួន ៣០០ ពាន់លានដុល្លារដែលត្រូវបានបង្កក។ សារព័ត៌មាននេះ សន្និដ្ឋានថា៖«ជនជាតិអឺរ៉ុបមានអារម្មណ៍ថា ខ្មាស់អៀន» ដោយសាររស្ស៊ី និងសហរដ្ឋអាមេរិកកំពុងកំណត់អនាគតរបស់ពួកគេ។ «មនុស្សពេញវ័យបានពិភាក្សាអំពី សំណើអ៊ុយក្រែននេះ» ហើយ «ជនជាតិអឺរ៉ុបកំពុងក្លាយជាមនុស្សមិនសំខាន់នៅលើទឹកដីរបស់ពួកគេ»៕