ទូរទស្សន៍ក្នុងស្រុក Kompas TV បានរាយការណ៍ថា អគ្គិភ័យបានឆាបឆេះឡើង នៅឯអគារមួយកម្ពស់ ៧ជាន់ ក្នុងរដ្ឋធានីហ្សាការតារបស់ប្រទេសឥណ្ឌូនេស៊ី នៅថ្ងៃអង្គារ (ទី៩ ខែធ្នូ) នេះ ដោយ មនុស្ស ១៣នាក់យ៉ាងតិច ត្រូវបានបញ្ជាក់ថា ស្លាប់ ហើយមួយចំនួនទៀតនៅតែជាប់ខាងក្នុងនោះ។

ទូរទស្សន៍ Kompas TV បានរាយការណ៍ថា អគ្គិភ័យនេះត្រូវបានពន្លត់ហើយ ខណៈដែលកិច្ចប្រឹងប្រែងជម្លៀសមនុស្សចេញពីអគារ នៅតែបន្តធ្វើ។

អគារនេះ គឺជាការិយាល័យរបស់ក្រុមហ៊ុន Terra Drone Indonesia ដែលផ្តល់យានដ្រូន សម្រាប់សកម្មភាពអង្កេតពីលើអាកាស ដោយអតិថិជនមានទាំងក្នុងវិស័យរុករករ៉ែ ដល់កសិកម្ម។ បើយោងតាមគេហទំព័ររបស់ក្រុមហ៊ុននេះ បានឲ្យដឹងថា ក្រុមហ៊ុនបានទទួលបានមូលនិធិពីក្រុមហ៊ុនយានដ្រូនជប៉ុន Terra Drone Corporation។

រូបភាពវីដេអូដែលចាក់ផ្សាយដោយទូរទស្សន៍ Kompas បានបង្ហាញឲ្យឃើញអ្នកពន្លត់អគ្គិភ័យរាប់សិបនាក់ព្យាយាមជម្លៀសមនុស្សនៅខាងក្នុង ហើយខ្លះទៀតកំពុងសែងថង់សាកសពចេញពីអាគារ៕