លោក Donald Trump បាននិយាយនៅក្នុងបទសម្ភាសន៍មួយដែលបានចេញផ្សាយកាលពីថ្ងៃអង្គារ ទី៩ ខែធ្នូ ថា អ៊ុយក្រែនគួរតែរៀបចំការបោះឆ្នោត ដោយបានចោទជាសំណួរថាតើប្រទេសនេះពិតជាមានលទ្ធិប្រជាធិបតេយ្យយ៉ាងពិតប្រាកដដែឬទេ ខណៈលោកបានបញ្ជាក់ជាថ្មីនូវការរិះគន់យ៉ាងខ្លាំងរបស់លោកចំពោះមេដឹកនាំអ៊ុយក្រែន។

ថ្លែងទៅកាន់សារព័ត៌មាន Politico ប្រធានាធិបតីសហរដ្ឋអាមេរិករូបនេះ បានចោទប្រកាន់ទីក្រុងគីវថា «កំពុងប្រើប្រាស់សង្គ្រាម» ដើម្បីបង្វៀងការបោះឆ្នោតដែលត្រូវបានពន្យារពេលក្រោមការដាក់ចេញច្បាប់អាជ្ញាសឹកចាប់តាំងពីការឈ្លានពានរបស់រុស្ស៊ីលើអ៊ុយក្រែនកាលពីខែកុម្ភៈ ឆ្នាំ២០២២។

លោក Trump បាននិយាយថា «ខ្ញុំគិតថា វាជាពេលវេលាដ៏សំខាន់ដើម្បីធ្វើការបោះឆ្នោត។ ពួកគេកំពុងប្រើប្រាស់សង្គ្រាមដោយមិនធ្វើការបោះឆ្នោត ប៉ុន្តែខ្ញុំគិតថាប្រជាជនអ៊ុយក្រែននឹងមានជម្រើសនោះ»។«ពួកគេនិយាយអំពីលទ្ធិប្រជាធិបតេយ្យ ប៉ុន្តែវាឈានដល់ចំណុចមួយដែលវាលែងជាលទ្ធិប្រជាធិបតេយ្យទៀតហើយ»។ បើគ្មានច្បាប់អាជ្ញាសឹកទេ ការបោះឆ្នោតប្រធានាធិបតីអ៊ុយក្រែននឹងត្រូវធ្វើឡើងតាំងពីខែមីនា ឆ្នាំ២០២៤។ លោក Trump បានបញ្ជាក់ជាថ្មីនូវការរិះគន់ដែលលោកបានធ្វើកាលពីថ្ងៃអាទិត្យអំពីលោក Volodymyr Zelenskyy ដោយអះអាងថា ប្រធានាធិបតីអ៊ុយក្រែនមិនបានអានផែនការរបស់សហរដ្ឋអាមេរិកដើម្បីបញ្ចប់សង្គ្រាមទេ។

ទន្ទឹមនឹងនេះ លោកប្រធានាធិបតី Volodymyr Zelensky បាននិយាយកាលពីថ្ងៃអង្គារថា អ៊ុយក្រែនបានត្រៀមខ្លួនរួចរាល់ហើយ ដើម្បីធ្វើការបោះឆ្នោតក្នុងរយៈពេល៦០ ទៅ៩០ ថ្ងៃខាងមុខ ប្រសិនបើសម្ព័ន្ធមិត្តរបស់ខ្លួនអាចធានាបានសន្តិសុខសម្រាប់ការបោះឆ្នោត បន្ទាប់ពីការរិះគន់ពីសមភាគីអាមេរិករបស់លោក គឺលោក Donald Trump។ លោក Zelenskyy បានប្រាប់អ្នកសារព័ត៌មាន នៅពេលដែលលោកចាកចេញពីប្រទេសអ៊ីតាលី បន្ទាប់ពីជំនួបជាមួយនាយករដ្ឋមន្ត្រីអ៊ីតាលី និងសម្តេចប៉ាប Leo ថា «ខ្ញុំត្រៀមខ្លួនរួចរាល់ហើយសម្រាប់ការបោះឆ្នោត» ។