រដ្ឋាភិបាលសហរដ្ឋអាមេរិក បានចេញការដាក់ទណ្ឌកម្មទៅលើពលរដ្ឋកូឡុំប៊ី៤រូប និងអាជីវកម្មចំនួនបួន ដោយចោទប្រកាន់ពួកគេថាបានបង្កើត «បណ្តាញឆ្លងដែន» ដើម្បីរកប្រាក់ចំណេញពីសង្គ្រាមស៊ីវិលនៅប្រទេសស៊ូដង់។

កាលពីថ្ងៃអង្គារ ក្រសួងរតនាគារសហរដ្ឋអាមេរិក បានចេញផ្សាយសេចក្តីថ្លែងការណ៍មួយដែលកំណត់អត្តសញ្ញាណមនុស្ស៤រូប ជាអ្នកចូលរួមក្នុងផែនការជ្រើសរើសអតីតសមាជិកយោធាកូឡុំប៊ី ឱ្យទៅប្រយុទ្ធនៅប្រទេសស៊ូដង់។

ខណៈនៅក្នុងប្រទេសអាហ្វ្រិកខាងកើត អតីតទាហានទាំងនោះតាមការចោទប្រកាន់ ថា ត្រូវបានគេប្រើដើម្បីជួយបណ្តុះបណ្តាលកងកម្លាំងគាំទ្ររហ័ស(RSF)ជាក្រុមយោធាប៉ារ៉ា ដែលជាប់ក្នុងការតតាំងដើម្បីអំណាចប្រឆាំងនឹងកងកម្លាំងរដ្ឋាភិបាលស៊ូដង់។

មន្ត្រីក្រសួងរតនាគារ លោក John K Hurley បាននិយាយនៅក្នុងសេចក្តីថ្លែងការណ៍ថា «កងកម្លាំងគាំរហ័ស(RSF) បានបង្ហាញម្តងហើយម្តងទៀតថា ខ្លួនមានឆន្ទៈក្នុងការកំណត់គោលដៅលើជនស៊ីវិល រួមទាំងទារក និងកុមារតូចៗ។ ភាពឃោរឃៅរបស់ខ្លួន បានធ្វើឱ្យជម្លោះកាន់តែជ្រៅ និងធ្វើឱ្យតំបន់មានអស្ថិរភាព ដែលបង្កើតលក្ខខណ្ឌនានាសម្រាប់ក្រុមភេរវករឱ្យរុលទៅមុខ»។

ក្រសួងរតនាគារបាននិយាយបន្ថែមថា ជម្លោះនេះ «បានបង្កឱ្យមានវិបត្តិមនុស្សធម៌ដ៏អាក្រក់បំផុតរបស់ពិភពលោក»។ ការប្រយុទ្ធគ្នា បានរាលដាលនៅក្នុងប្រទេសស៊ូដង់ចាប់តាំងពីការផ្ទុះឡើងសង្គ្រាមកាលពីក្នុងខែមេសា ឆ្នាំ២០២៣ ហើយមនុស្សជាង១២,៤ លាននាក់ត្រូវបានបង្ខំឱ្យចាកចេញពីលំនៅឋានរបស់ខ្លួន ដែលរួមចំណែកដល់ការភៀសខ្លួនទាំងនៅក្នុងព្រំដែនប្រទេសនិងនៅតំបន់ជុំវិញនោះ។ មនុស្សជាង ៣,៣ លាននាក់បានភៀសខ្លួនចេញពីប្រទេសស៊ូដង់ជាជនភៀសខ្លួន។