និស្សិតប្រទេសឆែក បានតវ៉ានៅទីក្រុងប្រាក កាលពីថ្ងៃអង្គារ ទី៩ ខែធ្នូ ខណៈប្រធានាធិបតី លោក Petr Pavel បានតែងតាំងមេដឹកនាំដែលជាមហាសេដ្ឋីមកពីគណបក្សANOប្រជានិយម លោក Andrej Babis ជានាយករដ្ឋមន្ត្រី។

ក្រុមអ្នកតវ៉ា ក៏បានប្រឆាំងនឹងចំណាត់ការរបស់លោក Babis ក្នុងការតែងតាំងរដ្ឋមន្ត្រីក្រសួងបរិស្ថាន លោក Filip Turek ជាមេដឹកនាំដ៏ចម្រូងចម្រាសរបស់គណបក្ស Motorists ដែលប្រឆាំងនឹងនិយ័តកម្មអាកាសធាតុ និងការបំភាយឧស្ម័នរបស់សហភាពអឺរ៉ុប។

លោក Babis នឹងឡើងកាន់អំណាចពីរដ្ឋបាលកណ្តាលស្តាំនិយមដែលគាំទ្រអ៊ុយក្រែនយ៉ាងខ្លាំង បន្ទាប់ពីគណៈរដ្ឋមន្ត្រីពេញលេញរបស់លោក នឹងត្រូវបានតែងតាំងនៅថ្ងៃទី១៥ ខែធ្នូ។

លោក Babis មានអាយុ៧១ឆ្នាំ បានវិលត្រឡប់ទៅកាន់អំណាចវិញ បន្ទាប់ពីបានប្រឆាំងរយៈពេលបួនឆ្នាំ ដែលក្នុងអំឡុងពេលនោះ លោកបានផ្លាស់ប្តូរពីក្រុមកណ្តាលសេរីនិយម ទៅជាកម្លាំងស្តាំនិយមជ្រុលអឺរ៉ុប ដោយចូលរួមជាមួយក្រុម Patriots for Europe នៅក្នុងសភាអឺរ៉ុប។