អ្នកធ្វើធម្មយាត្រារាប់ពាន់នាក់ បានដើរតាមផ្លូវនៅជាយភ្នំភ្លើង Popocatepetl ដែលគ្របដណ្តប់ដោយព្រិល កាលពីថ្ងៃអង្គារ ទី៩ ខែធ្នូ ដោយឆ្ពោះទៅកាន់ព្រះវិហារ បាស៊ីលីកា អូហ្វ កាដាលូប៉េ(Basilica of Guadalupe) នៅទីក្រុង Mexico City មុនថ្ងៃទី១២ ខែធ្នូ នៅពេលដែលមនុស្សរាប់លាននាក់ប្រមូលផ្តុំគ្នាដើម្បីគោរពដល់ព្រះម៉ែ កាដាលូប៉េ(Guadalupe) ជាឥស្សរជនសាសនាគួរឱ្យគោរពបំផុតរបស់ប្រទេសម៉ិកស៊ិក។

ក្នុងអំឡុងពេលធ្វើដំណើរ អ្នកគោរពបូជាបានកាន់រូបសំណាក ឬរូបភាពដែលដាក់ស៊ុមរបស់ព្រះម៉ែដើម្បីទទួលពរជ័យនៅអគារ Basilica។ សម្រាប់អ្នកមួយចំនួន ការធ្វើដំណើរនេះចំណាយពេលរហូតដល់បីថ្ងៃ។

ព្រះវិហារ Basilica of Guadalupe ជាធម្មតាទទួលបានអ្នកមកទស្សនាជាង១១លាននាក់ក្នុងអំឡុងពេលប្រារព្ធពិធីប្រចាំឆ្នាំ ដែលជាប្រពៃណីលាយឡំគ្នានូវការលះបង់របស់ក្រុមកាតូលិកជាមួយទំនៀមទម្លាប់ជនជាតិដើមភាគតិច ហើយនៅតែជាធម្មយាត្រាសាសនាធំបំផុតមួយនៅអាមេរិកឡាទីន។