ប្រធានាធិបតីអាមេរិក លោក ដូណាល់ ត្រាំ បានរិះគន់ចំពោះការពិន័យដែលដាក់ដោយគណៈកម្មការអឺរ៉ុបទៅលើប្រព័ន្ធផ្សព្វផ្សាយសង្គម X ហើយលោកបានព្រមានថា អឺរ៉ុបកំពុង«ផ្លាស់ប្តូរទិសដៅដ៏អាក្រក់មួយចំនួន»។

នៅពេលសួរអំពីការពិន័យនេះនៅក្នុងកិច្ចប្រជុំជាមួយតំណាងឧស្សាហកម្មកសិកម្មនៅសេតវិមាន លោក ត្រាំ បានហៅការសម្រេចចិត្តរបស់ទីក្រុងប្រ៊ុចសែលថា «ពិតជាគ្រោះថ្នាក់» ហើយបានបន្ថែមថា           ៖«ខ្ញុំមិនគិតថា វាត្រឹមត្រូវនោះទេ។ អឺរ៉ុបត្រូវតែប្រុងប្រយ័ត្នខ្ពស់បំផុត»។

លោកបានសម្តែងការព្រួយបារម្ភអំពីផ្លូវនយោបាយបច្ចុប្បន្នដែលធ្វើឡើងដោយប្រទេសសហភាពអឺរ៉ុប។   លោកប្រធានាធិបតី បាននិយាយថា៖«យើងចង់រក្សាអឺរ៉ុបឲ្យនៅជាអឺរ៉ុប។ អឺរ៉ុបកំពុងផ្លាស់ប្តូរទិសដៅ    ដ៏អាក្រក់មួយចំនួន។ វាគឺអាក្រក់ខ្លាំងណាស់ អាក្រក់ណាស់សម្រាប់ប្រជាជន។ យើងមិនចង់ឲ្យអឺរ៉ុបផ្លាស់ប្តូរច្រើននោះទេ»។ 

នៅថ្ងៃទី ០៥ ខែធ្នូ គណៈកម្មការអឺរ៉ុប បានផាកពិន័យបណ្តាញសង្គម X ចំនួន ១២០ លានអឺរ៉ូ ពីបទរំលោភលើបទប្បញ្ញត្តិឌីជីថលរបស់សហភាពអឺរ៉ុប។

លោក Tom Rainier តំណាងគណៈកម្មការអឺរ៉ុប បាននិយាយនៅក្នុងសន្និសីទសារព័ត៌មានមួយថា    ប្រព័ន្ធផ្សព្វផ្សាយសង្គម X បានរំលោភលើច្បាប់តម្លាភាព។ យោងតាមលោកបានឲ្យដឹងថា ការផាកពិន័យនេះ រួមបញ្ចូលទាំងវត្តមាននៃស្លាកសញ្ញាអ្នកប្រើប្រាស់ពណ៌ខៀវ ដែលបានផ្ទៀងផ្ទាត់ដោយផ្អែកលើថ្លៃ   សេវានៅលើកម្មវិធី ដែលកំពុងធ្វើឲ្យមានការយល់ច្រឡំ ពីព្រោះអ្នកណាម្នាក់អាចទិញវាបាន ហើយ         បណ្តាញសង្គម X នេះ មិនបានធ្វើការផ្ទៀងផ្ទាត់គ្រប់គ្រាន់នោះទេ៕