ប្រធានាធិបតីអាមេរិក លោក Donald Trump បានព្យាយាមធានាដល់ប្រជាជនអាមេរិកឡើងវិញថា សេដ្ឋកិច្ចរបស់សហរដ្ឋអាមេរិក មានស្ថានភាពល្អប្រសើរ នៅឯកន្លែងជួបជុំតាមបែបយុទ្ធនាការ កាលពីថ្ងៃអង្គារ (ទី៩ ខែធ្នូ) ខណៈដែលគណបក្សសាធារណរដ្ឋកំពុងត្រៀមតទល់យ៉ាងស្វិតស្វាញ ដើម្បីគ្រប់គ្រងសភា នៅក្នុងការបោះឆ្នោតពាក់កណ្តាលអាណត្តិ នាឆ្នាំក្រោយ។

អំឡុងពេលថ្លែងនៅឯកាស៊ីណូ Mount Pocono នៅភាគឦសានរដ្ឋ Pennsylvania លោក Trump បានអះអាងថា គោលនយោបាយសេដ្ឋកិច្ចរបស់លោក ក្នុងនោះរួមទាំងការដំឡើងពន្ធគ្រប់ទិសទីលើការនាំចូល កំពុងបង្កើតការងារ ជំរុញទីផ្សារភាគហ៊ុន និងទាក់ទាញការវិនិយោគបន្ថែមទៀតចូលសហរដ្ឋអាមេរិក។ លោក Trump បាននិយាយថា៖ «ខ្ញុំមិនមានអាទិភាពណាខ្ពស់ជាងការធ្វើឲ្យអាមេរិកចំណាយយ៉ាងសមរម្យលើតម្លៃនៃការរស់នៅម្តងទៀតនោះឡើយ»។

ទិន្នន័យរបស់រដ្ឋាភិបាលបង្ហាញថា កំណើនការងារបានធ្លាក់ចុះ អំឡុងអាណត្តិទី២ របស់លោក Trump ភាពអត់ការងារធ្វើបានកើនឡើងដល់កម្រិតខ្ពស់បំផុត ក្នុងរយៈពេល ៤ឆ្នាំ ហើយតម្លៃអ្នកប្រើប្រាស់ នៅតែខ្ពស់ដដែល។ សរុបមក កំណើនសេដ្ឋកិច្ចបានស្ទុះងើបឡើងវិញបន្តិច បន្ទាប់ពីវាបានធ្លាក់ចុះ ក្នុងអំឡុងពេលប៉ុន្មានខែដំបូងនៃឆ្នាំនេះ។

លោក Trump បានលើកឡើងថា លោកបានជួយធ្វើឲ្យថ្លៃសាំង និងថាមពល និងស៊ុតធា្លក់ចុះ។ លោកបានរិះគន់អ្នកកាន់តំណែងមុនរបស់លោក នៅក្នុងសេតវិមាន គឺលោក Joe Biden ដែលជាសមាជិកបក្សប្រជាធិបតេយ្យ ចំពោះតម្លៃទំនិញផ្សេងទៀតឡើងខ្ពស់ ទោះបីជាឥឡូវនេះ លោកបានកាន់តំណែងជិត ១ឆ្នាំហើយក៏ដោយ។

ប្រជាប្រិយភាពរបស់លោក Trump បានកើនឡើងដល់ទៅ ៤១ភាគរយនៅក្នុងការស្ទង់មតិថ្មីរបស់អង្គភាព Reuters/Ipsos ខណៈដែលលោកបានដកពន្ធមួយចំនួនលើការនាំចូលអាហារ ហើយបាននិយាយបន្ថែមទៀត អំពីការប្រយុទ្ធប្រឆាំងនឹងអតិផរណា។ ប៉ុន្តែការគាំទ្រ ចំពោះរូបលោក ជុំវិញការអនុវត្តលើតម្លៃនៃការរស់នៅ មានត្រឹមតែ ៣១ភាគរយប៉ុណ្ណោះ៕