អគ្គលេខាធិការអង្គការសហប្រជាជាតិ (UN) លោក Antonio Guterres បានព្រមានកាលពីថ្ងៃអង្គារ (ទី៩ ខែធ្នូ)ថា ប្រព័ន្ធមនុស្សធម៌ពិភពលោក កំពុងត្រូវបានជំរុញឲ្យដល់កម្រិតរឹតត្បិត ខណៈដែលការផ្តល់មូលនិធិ សម្រាប់មូលនិធិឆ្លើយតបគ្រោះអាសន្នសំខាន់ (CERF) បានធ្លាក់ចុះដល់កម្រិតទាបបំផុត ក្នុងរយៈពេលមួយទសវត្សរ៍។

នៅឯព្រឹត្តិការណ៍សន្យាកម្រិតខ្ពស់ សម្រាប់ CERF ឆ្នាំ២០២៦ លោក Guterres បាននិយាយថា «យើងកំពុងជួបប្រទះនូវពេលវេលាដ៏លំបាកណាស់» ហើយលោកសង្កត់ធ្ងន់ថា «តម្រូវការមនុស្សធម៌កំពុងកើនឡើង» ខណៈដែល «វិបត្តិកំពុងរីកធំឡើង»។ លោកបានព្រមានថា «ធនធានរបស់ប្រព័ន្ធមនុស្សធម៌ កំពុងកាន់តែអស់ទៅៗហើយ ដោយមានជីវិតមនុស្សរាប់លាននាក់កំពុងស្ថិតក្នុងភាពមិនច្បាស់លាស់»។

លោក Guterres បានគូសបញ្ជាក់តួនាទីរបស់ CERF ថា ជា «មូលនិធិឆ្លើយតបដំបូងដែលអាចបត់បែនបាន» របស់ UN ដោយកត់សម្គាល់ថា «ចាប់តាំងពីឆ្នាំ២០០៦ មក ទីភ្នាក់ងារនេះបានផ្ដល់ជិត ១០ពាន់លានដុល្លារ ជាជំនួយសង្គ្រោះអាយុជីវិត នៅក្នុងប្រទេសជាង ១០០ ដោយធ្វើការជាមួយភ្នាក់ងារ UN ជាង ២០ស្ថាប័ន និងដៃគូរាប់រយ ហើយទៅដល់ដៃមនុស្សរាប់សិបលាននាក់ជារៀងរាល់ឆ្នាំ»។

យ៉ាងណាក្ដី ប្រមុខ UN បានព្រមានថា ឥឡូវនេះ ប្រព័ន្ធមនុស្សធម៌ កំពុងប្រឈមនឹង «ការសាកល្បងដ៏ធំបំផុត» ដោយការបរិច្ចាគរបស់ម្ចាស់ជំនួយ នៅឆ្នាំ២០២៥ បានធ្លាក់ចុះ «យ៉ាងខ្លាំង មិនដែលមានពីមុនឡើយ»៕