ក្រុមឧទ្ទាម M23 ដែលគាំទ្រដោយរ៉្វាន់ដា បានចូលទៅដល់ទីក្រុង Uvira នៅភាគខាងកើតនៃប្រទេសកុងហ្គោ ក្បែរព្រំដែនជាមួយប៊ូរុនឌី។ នេះបើតាមប្រភពចំនួន ៤ ក្នុងនោះរួមមានទាំងអ្នកស្រុក ២នាក់ផងដែរ ដែលបានប្រាប់សារព័ត៌មាន Reuters នាថ្ងៃពុធ (ទី១០ ខែធ្នូ) នេះ។

ព្រឹត្ដិការណ៍ដ៏សំខាន់ចុងក្រោយបង្អស់ សម្រាប់ការរុលទៅមុខរបស់ក្រុមឧទ្ទាមតាមតំបន់សម្បូរធនធានរ៉ែ កើតមានឡើងមិនដល់មួយសប្តាហ៍ផង បន្ទាប់ពីប្រធានាធិបតីកុងហ្គោ លោក Felix Tshisekedi និងសមភាគីរ៉្វាន់ដា លោក Paul Kagame បានជួបជាមួយប្រធានាធិបតី លោក Donald Trump ក្នុងទីក្រុងវ៉ាស៊ីនតោន ហើយបានបញ្ជាក់ពីការប្តេជ្ញាចិត្តរបស់ប្រទេសទាំង២ ចំពោះកិច្ចព្រមព្រៀងសន្តិភាពដែលសម្របសម្រួលដោយសហរដ្ឋអាមេរិក។

រ្វ៉ាន់ដា បដិសេធមិនបានគាំទ្រក្រុម M23 នៅកុងហ្គោឡើយ ដោយបញ្ជាក់ថា កងទ័ពរបស់ខ្លួន មានវត្តមាននៅភាគខាងកើតកុងហ្គោ សម្រាប់តែ «វិធានការការពារ» ប៉ុណ្ណោះ ទោះបីជាទីក្រុងវ៉ាស៊ីនតោន និងអង្គការសហប្រជាជាតិ លើកឡើងថា ភស្តុតាងពីការគាំទ្ររបស់រ្វ៉ាន់ដា ចំពោះក្រុមឧទ្ទាមនេះ គឺច្បាស់លាស់ក៏ដោយ។

ទីភ្នាក់ងារព័ត៌មានសារព័ត៌មាន Reuters បានរាយការណ៍កាលពីថ្ងៃចន្ទថា ក្រុម M23 បានដណ្តើមកាន់កាប់ទីក្រុង Luvungi ជាទីប្រជុំជនដែលក្លាយជាសមរភូមិជួរមុខ ចាប់តាំងពីខែកុម្ភៈ ហើយការប្រយុទ្ធគ្នាយ៉ាងខ្លាំងក្លា កំពុងបន្តមាន នៅជិត Sange និង Kiliba ដែលជាភូមិចំនួន ២ទៀត នៅតាមបណ្តោយផ្លូវឆ្ពោះទៅកាន់ទីក្រុង Uvira ពីភាគខាងជើង។

តែយ៉ាងណាក្ដី គេមិនច្បាស់នោះទេនៅរសៀលថ្ងៃពុធថា តើក្រុម M23 បានគ្រប់គ្រងទាំងស្រុងលើទីក្រុង Uvira ដែរ ឬយ៉ាងណា ខណៈដែលអ្នកស្រុកបានរាយការណ៍ថា បានឮសំឡេងកាំភ្លើង៕