ប្រជាជនហុងឌុយរ៉ាស នៅទីក្រុងតេហ្គូស៊ីហ្គាល់ប៉ា (Tegucigalpa) កាលពីថ្ងៃពុធ ទី១០ ខែធ្នូ បានសម្តែងការព្រួយបារម្ភ និងការខកចិត្ត ខណៈប្រទេសនេះនៅតែគ្មានអ្នកទទួលជ័យជម្នះប្រធានាធិបតីផ្លូវការរយៈពេលជាងមួយសប្តាហ៍បន្ទាប់ពីការបោះឆ្នោតសកល ក្នុងពេលមានការពន្យារពេលក្នុងការបញ្ជូនលទ្ធផលបោះឆ្នោតបឋម។

ពលរដ្ឋនៅក្នុងរដ្ឋធានីបាននិយាយថា ការរាប់សន្លឹកឆ្នោតបានអូសបន្លាយពេល និងភាពមិនប្រាកដប្រជាបានធ្វើឱ្យសកម្មភាពបុណ្យណូអែលនៅក្នុងមជ្ឈមណ្ឌលប្រវត្តិសាស្ត្រត្រូវបានកាត់បន្ថយ និងធ្វើឱ្យបាត់បង់ទំនុកចិត្តលើដំណើរការបោះឆ្នោត ដោយមនុស្សមួយចំនួនពណ៌នាអំពីរដូវវិស្សមកាលនេះថាស្ងប់ស្ងាត់ខុសពីឆ្នាំមុនៗ។

អ្នកគាំទ្រគណបក្ស Libre party បានរៀបចំការអង្គុយនៅខាងក្រៅវិទ្យាស្ថានជាតិបណ្តុះបណ្តាលវិជ្ជាជីវៈ(INFOP) ជាកន្លែងដែលគេសន្មត់ថាត្រូវបានរក្សាទុកសម្ភារៈបោះឆ្នោត និងសន្លឹកឆ្នោត ដោយអំពាវនាវឱ្យអាជ្ញាធរបោះឆ្នោតមានចំណាត់ការតាមច្បាប់ ហើយប្រសិនបើចាំបាច់ត្រូវលុបចោល និងធ្វើការបោះឆ្នោតម្តងទៀត ឬប្រសិនបើដំណើរការមិនច្បាស់លាស់។

យោងតាមព័ត៌មានពីក្រុមប្រឹក្សាជាតិរៀបចំការបោះឆ្នោត(CNE)បានឲ្យដឹងថា សន្លឹកឆ្នោតសរុបក្នុងការបោះឆ្នោតប្រធានាធិបតីប្រហែល៩៩,៤០%ត្រូវបានដំណើរការរាប់ ដោយបន្សល់ទុកសន្លឹកឆ្នោតជាង ២.០០០សន្លឹកនៅរង់ចាំ ខណៈប្រព័ន្ធ TREP ដែលដំណើរការដោយក្រុមហ៊ុនកូឡុំប៊ី បានផ្អាកការបញ្ជូនដើម្បី «ការជួសជុល» ដែលជំរុញឱ្យមានការសង្ស័យបន្ថែមទៀត។ ការប្រកួតប្រជែងដ៏តានតឹងរវាងបេក្ខជនគណបក្សជាតិ បេក្ខជនគណបក្សសេរីនិយម និងបេក្ខជនគណបក្សLibre រួមជាមួយនឹងការចងចាំអំពីវិបត្តិបោះឆ្នោតឆ្នាំ២០១៧ ដែលត្រូវបានកត់សម្គាល់ដោយការដាច់ចរន្តអគ្គិសនី និងអំពើហិង្សា បានដាក់សម្ពាធបន្ថែមទៀតលើអាជ្ញាធរឱ្យផ្តល់លទ្ធផលមានតម្លាភាព និងគួរឱ្យទុកចិត្ត។