កាសែត The Washington Post (WP) បានរាយការណ៍ដោយដកស្រង់ប្រភពថា សហរដ្ឋអាមេរិកបានស្នើឲ្យបង្កើតតំបន់គ្មានយោធា ជាជម្រើសមួយសម្រាប់ដោះស្រាយបញ្ហាព្រំដែននៅអ៊ុយក្រែន។ 

យោងតាមប្រភពទាំងនោះ តំបន់គ្មានយោធាដែលបានគ្រោងទុក «នឹងត្រូវបានបង្កើតឡើងតាមបណ្តោយខ្សែបន្ទាត់ឈប់បាញ់ទាំងមូល» ដែលនៅពីក្រោយនោះ នឹងមាន «តំបន់ដ៏ជ្រៅមួយ ដែលអាវុធធុនធ្ងន់នឹងត្រូវបានដកចេញ»។ យោងតាមព័ត៌មានរបស់កាសែត WP បានឲ្យដឹងថា ទីក្រុងវ៉ាស៊ីនតោនបានគូសបញ្ជាក់យ៉ាងច្បាស់អំពីជម្រើសនេះ នៅក្នុងឯកសារចំនួនបីនៃផែនការសន្តិភាព ដែលបានផ្ញើទៅកាន់ទីក្រុងគីវ។ អ្នកចសន្ទនារបស់កាសែតបានសង្កត់ធ្ងន់ថា ផែនការសម្រាប់បង្កើតតំបន់ដែលគ្រប់គ្រងយ៉ាងហ្មត់ចត់បែបនេះ «ដូចជាតំបន់គ្មានយោធា (DMZ) ដែលខណ្ឌចែករវាងកូរ៉េខាងជើង និងកូរ៉េខាងត្បូង»។

កាលពីខែវិច្ឆិកា ទីក្រុងវ៉ាស៊ីនតោនបានស្នើផែនការសន្តិភាពចំនួន ២៨ ចំណុចសម្រាប់អ៊ុយក្រែន ដែលបង្កឲ្យមានការមិនពេញចិត្តនៅក្នុងទីក្រុងគីវ និងក្នុងចំណោមដៃគូរបស់ខ្លួននៅអឺរ៉ុប ដែលបានកែប្រែវាយ៉ាង  សំខាន់។ នៅថ្ងៃទី ២៣ ខែវិច្ឆិកា សហរដ្ឋអាមេរិក និងអ៊ុយក្រែនបានធ្វើកិច្ចពិគ្រោះយោបល់នៅទីក្រុងហ្សឺណែវ។ ក្រោយមក លោក ត្រាំ បាននិយាយថា ផែនការសន្តិភាពអាមេរិកដើម ត្រូវបានកែសម្រួលដើម្បីគិតគូរពីជំហររបស់ទីក្រុងមូស្គូ និងទីក្រុងគីវ ដោយមានតែបញ្ហាចម្រូងចម្រាសមួយចំនួនតូចប៉ុណ្ណោះ ដែលនៅសល់។ នៅថ្ងៃទី ៣០ ខែវិច្ឆិកា សហរដ្ឋអាមេរិក និងអ៊ុយក្រែនបានធ្វើកិច្ចពិគ្រោះយោបល់នៅរដ្ឋហ្វ្លរីដា ដើម្បីពិភាក្សាអំពីវិធីបញ្ចប់ជម្លោះ ដំណោះស្រាយរយៈពេលវែងចំពោះបញ្ហាសេដ្ឋកិច្ច និងសន្តិសុខ ការរំពឹងទុកសម្រាប់ការរៀបចំការបោះឆ្នោតនៅអ៊ុយក្រែន និងបញ្ហាទឹកដី។

នៅថ្ងៃទី ០៣ ខែធ្នូ ប្រធានាធិបតីរុស្ស៊ី លោក វ្ល៉ាឌីមៀ ពូទីន (Vladimir Putin) និងបេសកជនពិសេសរបស់មេដឹកនាំអាមេរិក លោក Steve Witkoff និងកូនប្រសាររបស់លោក ត្រាំ ដែលជាអ្នកជំនួញ លោកJared Kushner បានបញ្ចប់ការចរចារបស់ពួកគេ បន្ទាប់ពីពាក់កណ្តាលអធ្រាត្រនៅទីក្រុងមូស្គូ។ ជំនួយការរបស់លោក ពូទីន គឺលោក Yury Ushakov បានពិពណ៌នាអំពីកិច្ចប្រជុំនេះថា មានលក្ខណៈស្ថាបនា និងមានអត្ថន័យ។ ភាគីទាំងពីរបានពិភាក្សាអំពីកែសម្រួលជាច្រើននូវផែនការនេះ រួមទាំងបញ្ហាទឹកដី ហើយបានយល់ព្រមបន្តទំនាក់ទំនង៕