ប្រទេសអាល្លឺម៉ង់ បារាំង និងអេស្ប៉ាញ នឹងព្យាយាមក្នុងសប្តាហ៍នេះ ដើម្បីទម្លាយភាពជាប់គាំង លើកម្មវិធីយន្តហោះចម្បាំងជំនាន់ក្រោយរបស់អឺរ៉ុប ដែលជាគម្រោងមានតម្លៃរហូតដល់ ១០០ពាន់លានអឺរ៉ូ (១១៧ ពាន់លានដុល្លារ) ដែលត្រូវបានគេមើលឃើញថា មានសារៈសំខាន់ សម្រាប់មហិច្ឆតាការពារជាតិ ក្នុងតំបន់ ខណៈដែលសង្រ្គាមនៅអ៊ុយក្រែន កំពុងបន្ត។

កិច្ចប្រឹងប្រែងជំរុញដល់វឌ្ឍនភាព នៅក្នុងកិច្ចពិភាក្សា រវាងរដ្ឋមន្ត្រីការពារជាតិរបស់ប្រទេសទាំង៣ ធ្វើឡើងបន្ទាប់ពីមានសម្ពាធនយោបាយកាន់តែខ្លាំង ដើម្បីឲ្យសង្គ្រោះប្រព័ន្ធប្រយុទ្ធលើអាកាសនាពេលអនាគត (FCAS) ដែលបានចាប់ផ្តើមកាលពីជាង ៨ឆ្នាំមុន ប៉ុន្តែត្រូវបានធ្វើឲ្យជាប់គាំងដោយគូប្រជែងឧស្សាហកម្ម។

លោក Boris Pistorius របស់អាល្លឺម៉ង់ លោកស្រី Catherine Vautrin របស់បារាំង និងលោកស្រី Margarita Robles របស់អេស្ប៉ាញ គ្រោងនឹងជួបប្រជុំគ្នានៅទីក្រុងប៊ែរឡាំង នាថ្ងៃព្រហស្បតិ៍ (ទី១១ ខែធ្នូ) នេះ ដើម្បីពិភាក្សា អំពីជោគវាសនានៃគម្រោង FCAS ឬ SCAF ជាភាសាបារាំង។

ផែនការសម្រាប់កម្មវិធី FCAS ត្រូវបានជាប់គាំងដោយសារការខ្វែងគំនិតគ្នា រវាងក្រុមហ៊ុន Dassault Aviation និង Airbus របស់បារាំង អំពីរបៀបដែលការផលិត និងការអភិវឌ្ឍបច្ចេកវិទ្យា គួរតែត្រូវបានបែងចែក។

អ្នកនាំពាក្យក្រសួងការពារជាតិអាល្លឺម៉ង់ បាននិយាយកាលពីថ្ងៃចន្ទថា គម្រោងចុះកិច្ចសន្យាការពារជាតិ នឹងស្ថិតក្នុងរបៀបវារៈនៅទីក្រុងប៊ែរឡាំង នៅពេលត្រូវបានសួរថា តើការបណ្តាក់ទុនលើកម្មវិធី FCAS នឹងត្រូវបានពិភាក្សាដែរ ឬទេ។

អធិការបតីអាល្លឺម៉ង់ លោក Friedrich Merz និងប្រធានាធិបតីបារាំង លោក Emmanuel Macron ក៏ត្រូវបានគេរំពឹងថា នឹងស្វែងរកដំណោះស្រាយនៃការខ្វែងគំនិតគ្នានេះ នៅពេលដែលពួកលោក ជួបប្រជុំគ្នានៅសប្តាហ៍ក្រោយ៕