អ្នកវិភាគនិយាយប្រាប់ទីភ្នាក់ងារព័ត៌មានរ៉យទ័រថា រលកនៃរដ្ឋប្រហារកាលពីពេលកន្លងទៅនៅអាហ្វ្រិកខាងលិច បង្ហាញពីបរាជ័យនៃការរៀបចំក្នុងតំបន់ ដើម្បីការពារលទ្ធិប្រជាធិបតេយ្យ ដោយមេដឹកនាំរដ្ឋប្រហារចង់បន្តក្តោបក្តាប់អំណាចរបស់ពួកគេ ។

អ្នកស្រី Nina Wilen គឺជាប្រធានកម្មវិធីអាហ្វ្រិកនៅវិទ្យាស្ថានភូមិន្ទទំនាក់ទំនងអន្តរជាតិមានមូលដ្ឋាននៅទីក្រុងព្រុចសែល ប្រទេសបែលហ្ស៊ិក និយាយថា រដ្ឋប្រហារប៉ុនប៉ងនៅប្រទេសបេណាំង និងការដណ្តើមគ្រប់គ្រងអំណាចដោយជោគជ័យនៅប្រទេសហ្គីណេប៊ីសូ ក្នុងខែនេះ បង្ហាញពីការវិលត្រឡប់ទៅរកអស្ថិរភាពដ៏គួរឲ្យព្រួយបារម្ភ ក្រោយភាពស្ងប់ស្ងាត់អស់រយៈពេល ២ឆ្នាំ ។

អ្នកស្រី Wilen និយាយថា ពួកយើងមានរយៈពេល ២ឆ្នាំ ដោយគ្មានរដ្ឋប្រហារ ចាប់តាំងពីរដ្ឋប្រហារនៅប្រទេសនីហ្សេ កាលពីឆ្នាំ ២០២៣ និងរដ្ឋប្រហារនៅប្រទេសហ្គាបុង កាលពីឆ្នាំ ២០២៣ ។ 

អ្នកស្រីបន្តថា មូលហេតុសំខាន់សម្រាប់ក្រុមអ្នករៀបចំធ្វើរដ្ឋប្រហារ គឺក្រុមមេដឹកនំារដ្ឋប្រហារទាំងអស់ដែលបានដណ្តើមអំណាចក្នុងរយៈពេល ៥ឆ្នាំកន្លងមកនេះនៅអាហ្វ្រិក ពួកគេនៅតែបន្តកាន់អំណាចដដែល ។

ជាការបង្ហាញការឆ្លើយតបពុំស៊ីសង្វាក់គ្នារបស់ប្លុកមួយនេះ ចំពោះរដ្ឋប្រហារនៅប្រទេសប៊ូគីណាហ្វាសូ ម៉ាលី និងនីហ្សេ ចាប់តាំងពីឆ្នាំ ២០២០មក អ្នកស្រី Wilen និយាយថា រដ្ឋសហគមន៍សេដ្ឋកិច្ចអាហ្វ្រិកខាងលិច(ECOWAS) ពិតជាបានខកខានធ្វើជាអ្នកធានាស្ថិរភាពប្រជាធិបតេយ្យ ។

អ្នកស្រីកត់សំគាល់ឃើញថា ក្រោយការគំរាមអន្តរាគមន៍យោធា បន្ទាប់ពីរដ្ឋប្រហារនៅនីហ្សេ អង្គការ ECOWAS បានដកការគំរាមវិញ ហើយក្រោយមកជំនួសដោយទណ្ឌកម្ម ពេលដែលប្រទេសទាំង ៣ ដកខ្លួនចេញពីអង្គការមួយនេះ ៕