ប្រជាពលរដ្ឋក្នុងរដ្ឋវ៉ាស៊ីនតោន រាប់ម៉ឺននាក់ នៅសហរដ្ឋអាមេរិក ស្ថិតក្រោមបញ្ជាជម្លៀសកាលពីថ្ងៃព្រហស្បតិ៍សប្ដាហ៍នេះ ក្រោយភ្លៀងធ្លាក់ខ្លាំង ដែលរុញឲ្យទឹកក្នុងទន្លេនានាហក់ឡើងលិចច្រាំង បង្កឲ្យមានល្បាប់ហូរចាក់លើផ្លូវហាយវ៉េ និងមនុស្សជាច្រើនជាប់ក្នុងទឹកជំនន់។

លោក Bob Ferguson អភិបាលរដ្ឋវ៉ាស៊ីនតោន បាននិយាយក្នុងសន្និសីទ្ធសារព័ត៌មាន កាលពីថ្ងៃព្រហស្បតិ៍ថា កម្រិតទឹកជំនន់ដែលពួកលោកកំពុងមើលឃើញពេលនេះគឺជាកម្រិតធ្ងន់ធ្ងរខ្លាំងក្នុងប្រវត្តិសាស្ត្រ ដូច្នេះពួកលោកចង់សង្កត់ធ្ងន់ថាតើស្ថានភាពធ្ងន់ធ្ងរបែបណា មួយថ្ងៃបន្ទាប់ពីការប្រកាសអាសន្នទូទាំងរដ្ឋ។  

សង្កាត់ Skagit ក្នុងតំបន់កសិកម្មដ៏សំខាន់មួយនៅភាគខាងជើងទីក្រុង ស៊ីអាថល (Seattle) បានបញ្ជាឲ្យមនុស្សគ្រប់គ្នានៅក្នុងតំបន់ទំនាបរបស់ទន្លេ Skagit River ជម្លៀសចេញ។មនុស្សចំនួន៧៨.០០០នាក់ រស់នៅក្នុងតំបន់នេះ ។

ក្រុមអ្នកជួយសង្គ្រោះបានប្រើប្រាស់ទូកកៅស៊ូ ដើម្បីជម្លៀសប្រជាពលរដ្ឋពីផ្លូវនានាដែលត្រូវទឹកជន់លិចក្នុងតំបន់ Snohomish របស់រដ្ឋវ៉ាស៊ីនតោន ក្រោយភ្លៀងធ្លាក់ខ្លាំងជាច្រើនថ្ងៃជន់លិចភូមិឋាននានាជម្រៅត្រឹមចង្កេះ៕