គណបក្សប្រឆាំងដ៏សំខាន់របស់ប្រទេសតង់ហ្សានីកាលពីថ្ងៃព្រហស្បតិ៍បាននិយាយថា មនុស្សជាង ២.000នាក់ ត្រូវបានសម្លាប់ នៅក្នុងអំពើហិង្សាក្នុងការបោះឆ្នោតមួយសប្តាហ៍ ដោយអំពាវនាវឲ្យមានការដាក់ទណ្ឌកម្មប្រឆាំងនឹងមន្ត្រីដែលត្រូវបានចោទប្រកាន់ពីបទឧក្រិដ្ឋកម្មប្រឆាំងនឹងមនុស្សជាតិ។

លោកស្រីប្រធានាធិបតី សាមៀ ស៊ូលូហ៊ូ ហាសាន់ (Samia Suluhu Hassan) ត្រូវបានប្រកាសថា ជាអ្នកឈ្នះនៃការបោះឆ្នោតនៅថ្ងៃទី ២៩ ខែតុលា ជាមួយនឹងសំឡេងឆ្នោត ៩៨ ភាគរយ ប៉ុន្តែរដ្ឋាភិបាលរបស់លោកស្រី ត្រូវបានចោទប្រកាន់ពីបទក្លែងបន្លំការបោះឆ្នោត និងត្រួតពិនិត្យយុទ្ធនាការឃាតកម្ម និងការចាប់ខ្លួនអ្នករិះគន់លោកស្រី ដែលបានបង្កឲ្យមានការតវ៉ា និងកុបកម្មទូទាំងប្រទេសនេះ។

អនុប្រធានបក្សប្រឆាំង Chadema លោក John Heche បានប្រាប់អ្នកយកព័ត៌មានថា ប្រទេសតង់ហ្សានីបានឃើញ «មនុស្សជាង ២.០០០នាក់ ត្រូវបានសម្លាប់ និងជាង ៥.000នាក់ រងរបួស ក្នុងរយៈពេលត្រឹមតែមួយសប្តាហ៍ប៉ុណ្ណោះ»។

លោកបាននិយាយថា អំពើហិង្សានេះ ត្រូវបានបង្កឡើង «ដោយមានការចូលរួមដោយផ្ទាល់ពីរដ្ឋ« ហើយវាស្មើនឹង «ឧក្រិដ្ឋកម្មប្រឆាំងនឹងមនុស្សជាតិ»។

ការរាប់ចំនួនអ្នកស្លាប់ពីគណបក្សប្រឆាំងពីមុន បានបង្ហាញថា មានចំនួនជាង ១.000នាក់។ ចំណែករដ្ឋាភិបាលមិនបានផ្តល់ចំនួនអ្នកស្លាប់ទេ។ 

លោក Heche បានជំរុញឲ្យសហគមន៍អន្តរជាតិ «ដាក់ទណ្ឌកម្មលើបុគ្គលទាំងអស់ដែលពាក់ព័ន្ធនឹងការរៀបចំផែនការ និងអនុវត្តសកម្មភាពឧក្រិដ្ឋកម្ម និងឧក្រិដ្ឋកម្មប្រឆាំងនឹងមនុស្សជាតិទាំងនេះ»៕