ប្រធានអ្នកចរចារបស់ឥណ្ឌូនេស៊ី បាននិយាយនៅថ្ងៃសុក្រ (១២ ធ្នូ) ថា ប្រទេសនេះរំពឹងថានឹងបញ្ចប់កិច្ចចរចាពន្ធគយជាមួយសហរដ្ឋអាមេរិក នៅចុងឆ្នាំនេះ ដោយគណៈប្រតិភូមួយក្រុម គ្រោងទៅបំពេញទស្សនកិច្ចនៅទីក្រុងវ៉ាស៊ីនតោន នៅសប្តាហ៍ក្រោយ ដើម្បីបន្តកិច្ចពិភាក្សាទាំងនោះ។

ការចរចាហាក់ដូចជាប្រឈមហានិភ័យនៃការដួលរលំនៅសប្តាហ៍នេះ បន្ទាប់ពីសហរដ្ឋអាមេរិក បានចោទទីក្រុងហ្សាការតាថា បានដើរថយក្រោយលើការប្តេជ្ញាចិត្តពីមុនរបស់ខ្លួន ទោះបីជាឥណ្ឌូនេស៊ី បាននិយាយថា ដំណើរការនៃកិច្ចចរចាគឺមានសភាពធម្មតា ហើយគ្រាន់តែជាបញ្ហានៃ "ការសម្របសម្រួល" ក្នុងការពិភាក្សាប៉ុណ្ណោះ។

ពេលវេលាសម្រាប់ការបញ្ចប់កិច្ចចរចានេះ កើតមានឡើងបន្ទាប់ពីជំនួបតាមអនឡាញកាលពីថ្ងៃព្រហស្បតិ៍ រវាងរដ្ឋមន្ត្រីសេដ្ឋកិច្ចជាន់ខ្ពស់របស់ឥណ្ឌូនេស៊ី លោក Airlangga Hartarto និងតំណាងពាណិជ្ជកម្មអាមេរិក លោក Jamieson Greer ស្តីពីពន្ធគយ។

គួរឱ្យដឹងថា កាលពីខែកក្កដា ភាគីទាំងពីរបាននិយាយថា ឥណ្ឌូនេស៊ីយល់ព្រមលុបពន្ធលើទំនិញអាមេរិកជាង ៩៩% និងលុបចោលរបាំងមិនមែនពន្ធទាំងអស់លើក្រុមហ៊ុនអាមេរិក ខណៈសហរដ្ឋអាមេរិក នឹងទម្លាក់ពន្ធគំរាមកំហែងរបស់ខ្លួនលើផលិតផលឥណ្ឌូនេស៊ី មកត្រឹម ១៩% ពីអត្រា ៣២% ពីមុន៕