អង្គការសហប្រជាជាតិ (UN) កាលពីថ្ងៃព្រហស្បតិ៍ (ទី១១ ខែធ្នូ) បានថ្កោលទោសការវាយប្រហារតាមអាកាសថ្មីៗ លើមន្ទីរពេទ្យ នៅក្នុងរដ្ឋ Rakhine របស់សហភាពមីយ៉ាន់ម៉ា ដែលតាមសេចក្ដីរាយការណ៍ បានសម្លាប់ជនស៊ីវិលជាង ៣០នាក់ និងរបួសជាង ៧០នាក់ រួមមានអ្នកជំងឺ អ្នកថែទាំ និងបុគ្គលិកពេទ្យ។

អ្នកនាំពាក្យ UN លោក Farhan Haq បាននិយាយក្នុងសន្និសីទសារព័ត៌មានថា៖ «អង្គការសហប្រជាជាតិ មានក្ដីបារម្ភយ៉ាងខ្លាំង ចំពោះរបាយការណ៍នៃការវាយប្រហារតាមអាកាស នៅក្នុងរដ្ឋ Rakhine កាលពីម្សិលមិញ (ថ្ងៃទី១០ ខែធ្នូ)»។ លោកបានកត់សម្គាល់ថា៖ «អង្គការសុខភាពពិភពលោកឲ្យថា នេះគឺជាការវាយប្រហារលើកទី៦៧ លើទីតាំងសុខភាព នៅសហភាពមីយ៉ាន់ម៉ា ដែលទីភ្នាក់ងារបានផ្ទៀងផ្ទាត់នៅឆ្នាំនេះ»។

លោក Haq បានសង្កត់ធ្ងន់ថា៖ «ទីតាំងពេទ្យ និងជនស៊ីវិល ក្នុងនោះរួមមានទាំងបុគ្គលិកពេទ្យផងដែរ ត្រូវតែត្រូវបានគោរព និងការពារ»។

លោកបានបន្ថែមថា៖ «អង្គការសហប្រជាជាតិថ្កោលទោសការវាយប្រហារនេះ ដែលជាផ្នែកមួយនៃគំរូដ៏ទូលំទូលាយនៃវាយប្រហារដែលបង្កគ្រោះថ្នាក់ដល់ជនស៊ីវិល និងទីតាំងស៊ីវិល ដែលបន្តបំផ្លិចបំផ្លាញសហគមន៍ទូទាំងប្រទេស»។ ហើយលោកបានអំពាវនាវឲ្យភាគីទាំងអស់ «គោរពកាតព្វកិច្ចរបស់ខ្លួន ក្រោមច្បាប់មនុស្សធម៌អន្តរជាតិ និងសិទ្ធិមនុស្សអន្តរជាតិ»។

ជាមួយគ្នានេះ លោកក៏បានសង្កត់ធ្ងន់ផងដែរលើតម្រូវការមនុស្សធម៌ដែលកំពុង «កើនឡើង" នៅមីយ៉ាន់ម៉ា ដោយព្រមានថា មនុស្ស ១៦,២លាននាក់ ក្នុងនោះរួមទាំងកុមារ ៥លាននាក់ផងដែរ នឹងត្រូវការជំនួយ និងការការពារនៅឆ្នាំក្រោយ»។

គួរបញ្ជាក់ថា យ៉ាងហោចណាស់មនុស្ស ៣៣នាក់ បានបាត់បង់ជីវិត និង ៧៦នាក់យ៉ាងតិច បានរងរបួសនៅពេលដែលកងកម្លាំងមីយ៉ាន់ម៉ា បានវាយប្រហារលើមន្ទីរពេទ្យ ក្នុងទីក្រុង Mrauk-U ដែលជាទីប្រជុំជននៅជិតព្រំដែនជាមួយប្រទេសបង់ក្លាដែស។ តែអាជ្ញាធរយោធាមិនបានទទួលស្គាល់ថា បានធ្វើប្រតិបត្តិការណាមួយ នៅក្នុងតំបន់នេះនោះទេ៕