អ្នកនាំពាក្យក្រសួងការបរទេសរុស្ស៊ី លោកស្រី Maria Zakharova បានថ្លែងថា បណ្តាប្រទេសលោកខាងលិចគួរតែយល់ពីផលវិបាកធ្ងន់ធ្ងរ ដែលពួកគេនឹងជួបប្រទះ ប្រសិនបើទ្រព្យសម្បត្តិរបស់រុស្ស៊ីដែលត្រូវបានបង្កក ត្រូវបានរឹបអូសដើម្បីផ្តល់មូលនិធិដល់អ៊ុយក្រែននោះ។  

លោកស្រីបាននិយាយឆ្លើយតបទៅនឹងសំណើសុំធ្វើអត្ថាធិប្បាយអំពីបាយការណ៍ប្រព័ន្ធផ្សព្វផ្សាយអំពីទីក្រុងតូក្យូដែលមិនយល់ស្របនឹងផែនការរឹបអូសទ្រព្យសម្បត្តិរបស់រុស្ស៊ីរបស់សហភាពអឺរ៉ុបថា៖ «ពួកគេត្រៀមខ្លួនរួចជាស្រេចដើម្បីធ្វើបែបនេះ ដោយការបំផ្លាញមូលដ្ឋានគ្រឹះនៃសុខុមាលភាពរបស់ពលរដ្ឋ និងអាជីវកម្មរបស់សហភាពអឺរ៉ុប ក៏ដូចជាប្រព័ន្ធហិរញ្ញវត្ថុសកលទាំងមូលក៏ដោយ។ ពួកគេមិនខ្វល់ទេ ពួកគេត្រៀមខ្លួនរួចជាស្រេច ដើម្បីបោះចោលវាទាំងអស់។ យើងអំពាវនាវឲ្យលោកខាងលិចមានភាពស្មោះត្រង់ជាមួយខ្លួនឯង និងវាយតម្លៃពីផលវិបាកនៅទីបំផុតនៃការរឹបអូសយកទ្រព្យសម្បត្តិ អធិបតេយ្យភាពរបស់ប្រជាជនដទៃដោយគណៈកម្មការអឺរ៉ុប។ ជាឧទាហរណ៍ ជំហានបែបនេះ នឹងប៉ះពាល់ដល់ស្ថិរភាពនៃតំបន់អឺរ៉ូ និងភាពទាក់ទាញនៃយុត្តាធិការសហភាពអឺរ៉ុបសម្រាប់វិនិយោគិនបរទេស ជាពិសេសមកពីប្រទេសអាស៊ី និងមជ្ឈិមបូព៌ា»។ 

នាពេលថ្មីៗនេះ សារព័ត៌មាន Politico ដែលបានដកស្រង់ប្រភពនៅក្នុងសេវាកម្មសកម្មភាពខាងក្រៅអឺរ៉ុប បានរាយការណ៍ថា ប្រទេសជប៉ុនបានបដិសេធសំណើរបស់សហភាពអឺរ៉ុប ក្នុងការរឹបអូសយកទ្រព្យសម្បត្តិរបស់រុស្ស៊ីដែលបានបង្កកប្រហែល ៣០ ពាន់លានដុល្លារ។ រដ្ឋមន្ត្រីក្រសួងហិរញ្ញវត្ថុ លោកស្រី Satsuki Katayama បានបញ្ជាក់ថា ប្រទេសជប៉ុនមិនមានសិទ្ធិចាត់ចែងទ្រព្យសម្បត្តិរបស់រុស្ស៊ី ដោយសារហេតុផលផ្លូវច្បាប់នោះទេ។ ក្រោយមក ទីភ្នាក់ងារសារព័ត៌មាន Kyodo បានរាយការណ៍ថា ក្រសួងហិរញ្ញវត្ថុជប៉ុន បានបដិសេធយ៉ាងទូលំទូលាយនូវភាពត្រឹមត្រូវនៃរបាយការណ៍ទាំងនេះ៕