ប្រទេសស្វីស នៅថ្ងៃសុក្រ (ទី១២ ខែធ្នូ) នេះ បានឲ្យដឹងថា ខ្លួននឹងកាត់បន្ថយចំនួនយន្តហោះចម្បាំង F-35A Lightning II របស់ក្រុមហ៊ុន Lockheed Martin ដែលខ្លួនកំពុងទិញពីសហរដ្ឋអាមេរិក ដើម្បីឲ្យវាអាចទៅតាមផែនការថវិកាដើម បន្ទាប់ពីតម្លៃនៃការបញ្ជាទិញបានឡើងខ្ពស់។

ទីក្រុង Bern បានជ្រើសរើស F-35A ជាយន្តហោះចម្បាំងជំនាន់ក្រោយរបស់ខ្លួន ក្នុងឆ្នាំ២០២១ សម្រាប់អ្វីដែលខ្លួនចាត់ទុកថា មានតម្លៃថេរ ៦ពាន់លានហ្វ្រង់ស្វីស (៧,៥៤ពាន់លានដុល្លារ) សម្រាប់យន្តហោះ ៣៦គ្រឿង។ ក្រោយមកសហរដ្ឋអាមេរិក បានប្រាប់ថា ចំនួនសរុប គឺមានកំហុសខ្គង។

បន្ទាប់ពីមានកិច្ចប្រជុំគណៈរដ្ឋមន្ត្រី រដ្ឋាភិបាលបានឲ្យដឹងថា ខ្លួនបានណែនាំក្រសួងការពារជាតិឲ្យទិញយន្តហោះ F-35A ក្នុងចំនួនខ្ពស់បំផុតតាមដែលអាចធ្វើទៅបាន ក្នុងកញ្ចប់ថវិកា ៦ពាន់លានហ្វ្រង់ស្វីស សម្រាប់យន្តហោះថ្មីដែលត្រូវបានអនុម័តដោយសាធារណជន តាមរយៈការបោះឆ្នោតប្រជាមតិឆ្នាំ២០២០។

រដ្ឋាភិបាលបានឲ្យដឹងនៅក្នុងសេចក្តីថ្លែងការណ៍មួយថា៖ «ដោយសារតែការចំណាយហួសប្រមាណ ការរក្សាចំនួនដែលបានគ្រោងទុកដំបូង ៣៦គ្រឿងនៃយន្តហោះចម្បាំង F-35A គឺមិនអាចទៅរួចឡើយតាមកម្រិតហិរញ្ញវត្ថុ»។

តែយ៉ាងណាក្ដី រដ្ឋាភិបាលបានបញ្ជាក់ថា រង់ចាំការពិនិត្យមើលថា តើត្រូវការជំហានបន្ថែមទៀតដែរ ឬទេ ក្នុងការបង្កើនសមត្ថភាពការពារជាតិរបស់ប្រទេសស្វីស ដើម្បីឲ្យគណៈរដ្ឋមន្ត្រីអាចធ្វើការសម្រេចដែលអាចឲ្យវាឈានដល់គោលដៅដើម ៣៦គ្រឿងនោះ៕