អ្នកស្រី Hellen Etiman គឺជាអ្នកចិញ្ចឹមសត្វមួយរូបនៅកេនយ៉ា ជឿថា កូនប្រុសជួបកង្វះអាហារូបត្ថម្ភធ្ងន់ធ្ងររបស់គាត់ ក្នុងពេលដ៏ខ្លីខាងមុខ នឹងជាសះស្បើយឡើងវិញ ក្រោយចាប់ផ្តើមកម្មវិធីអាហារឯកទេសសង្រ្គោះជីវិត ។

ប៉ុន្តែផ្ទុយទៅវិញ ក្មេងប្រុស Peter Lokoyen អាយុ ៤ឆ្នាំ បែរជាមានអាការៈធ្ងន់ធ្ងរឡើងវិញកាលពីខែកក្កដា ពេលដែលមណ្ឌលសុខភាពព្យាបាលក្មេងប្រុស អស់គ្រឿងផ្គត់ផ្គង់វេជ្ជសាស្រ្ត ធ្វើឲ្យគ្រួសាររបស់ក្មេងប្រុសពឹងផ្អែកលើផ្លែឈើព្រៃបេះបានតាមវាលទំនាបស្ងួតក្នុងស្រុក Turkana ស្ថិតនៅតំបន់ភាគពាយ័ព្យប្រទេសកេនយ៉ា ។ 

គិតត្រឹមចុងខែតុលា ក្មេងប្រុស Lokoyen មានទម្ងន់ត្រឹម ១១,៤គ.កប៉ុណ្ណោះ ពោលគឺស្មើនឹង ១ភាគ ៣ នៃទម្ងន់មធ្យមរបស់ក្មេងប្រុសមានអាយុស្មើរូបគេដែលបានចុះបញ្ជីដោយអង្គការសុខភាពពិភពលោក(WHO) និងមានកម្ពស់ ៨៧សង់ទីម៉ែត្រ ។ ប្អូនស្រី Melvine អាយុ ២០ខែរបស់ក្មេងប្រុស មានកម្ពស់ស្មើក្មេងប្រុសទៅហើយ ។

មន្រ្តីជំនួយបច្ចុប្បន្ន និងអតីតមន្រ្តីជំនួយចំនួន ៥នាក់ និយាយប្រាប់ទីភ្នាក់ងារព័ត៌មានរ៉យទ័រថា ការសម្រេចចិត្តរបស់ប្រធានាធិបតីសហរដ្ឋអាមេរិកលោក Donald Trump ដើម្បីរុះរើទីភ្នាក់ងារអភិវឌ្ឍន៍អន្តរជាតិសហរដ្ឋអាមេរិក និងការកាត់បន្ថយកម្មវិធីជំនួយសកល បានកាត់ផ្តាច់ជីវិតកុមារដូចជាក្មេងប្រុស Peter ។

ទីភ្នាក់ងារសហរដ្ឋអាមេរិកមួយនេះ បានផ្តល់មូលនិធិសម្រាប់ការទិញ និងចែកចាយប្រហែលពាក់កណ្តាលនៃការផ្គត់ផ្គង់អាហារូបត្ថម្ភ(RUTF)របស់ពិភពលោក ដែលប្រើប្រាស់សម្រាប់ព្យាបាលកុមារជួបកង្វះអាហារូបត្ថម្ភធ្ងន់ធ្ងរ ។

មូលនិធិកុមារអន្តរជាតិអង្គការសហប្រជាជាតិ(UNICEF) ដែលជាអ្នកទិញ និងអ្នកចែកចាយអាហារូបត្ថម្ភ RUTF ធំជាងគេបំផុតរបស់ពិភពលោក និយាយថា គ្រោះរាំងស្ងួត ធ្វើឲ្យតម្រូវការកើនឡើងសម្រាប់ប៉ាស្តាមានជីវជាតិនៅតាមតំបន់ជាច្រើនរបស់កេនយ៉ា ខណៈការកាត់បន្ថយមូលនិធិសម្រាប់សហគមន៍ ធ្វើឲ្យប៉ះពាល់យ៉ាងខ្លាំង ដល់កុមារកំពុងជួបកង្វះអាហារូបត្ថម្ភធ្ងន់ធ្ងរ ៕