ប្រធានាធិបតីសហរដ្ឋអាមេរិក លោក Donald Trump បាននិយាយកាលពីថ្ងៃសុក្រ ទី១២ ខែធ្នូ ថា កងកម្លាំងសហរដ្ឋអាមេរិកនឹងចាប់ផ្តើមវាយប្រហារតាមជើងគោកប្រឆាំងអ្នកជួញដូរគ្រឿងញៀន បន្ទាប់ពីអ្វីដែលលោកបានពិពណ៌នាថាជាភាពជោគជ័យមិនធ្លាប់មានពីមុនមកក្នុងការស្ទាក់ចាប់ការដឹកជញ្ជូនគ្រឿងញៀនតាមសមុទ្រ។

ថ្លែងនៅឯសេតវិមានក្នុងអំឡុងពេលព្រឹត្តិការណ៍នៅការិយាល័យពងក្រពើ លោក Trump បាននិយាយថា សហរដ្ឋអាមេរិកពេលនេះកំពុងបញ្ឈប់គ្រឿងញៀនបាន៩៦% ដែលចូលមកតាមផ្លូវទឹក ហើយបានព្រមានថា «អ្នកដែលនាំគ្រឿងញៀនចូលមកប្រទេសរបស់យើងគឺជាគោលដៅ»។ កាលពីថ្ងៃព្រហស្បតិ៍ សប្តាហ៍នេះ លោក Trump បានផ្តល់សារស្រដៀងគ្នានេះ ដោយនិយាយថា ចរាចរណ៍គ្រឿងញៀនតាមសមុទ្របានធ្លាក់ចុះ៩២% បើប្រៀបធៀបទៅនឹងតួលេខ៩៦% ដែលលោកបានលើកឡើងកាលពីថ្ងៃសុក្រ។

ការរឹបអូសនាវាដឹកប្រេង Skipper ដោយសហរដ្ឋអាមេរិកនៅឆ្នេរសមុទ្រវ៉េណេស៊ុយអេឡា កាលពីថ្ងៃពុធ គឺជាលើកដំបូងហើយដែលសហរដ្ឋអាមេរិកបានរឹបអូសទំនិញប្រេងរបស់វ៉េណេស៊ុយអេឡា ចាប់តាំងពីទណ្ឌកម្មត្រូវបានដាក់នៅឆ្នាំ២០១៩។ វត្តមានយោធារបស់សហរដ្ឋអាមេរិក នៅក្នុងតំបន់សមុទ្រការ៉ាអ៊ីប បានកើនឡើង ខណៈលោក Trump ក្នុងសប្តាហ៍ថ្មីៗនេះបានពិភាក្សាអំពីអន្តរាគមន៍យោធាដែលអាចកើតមាននៅក្នុងប្រទេសវ៉េណេស៊ុយអេឡា ដោយផ្អែកលើការចោទប្រកាន់ថាប្រទេសនេះដឹកជញ្ជូនគ្រឿងញៀនចូលទៅកាន់សហរដ្ឋអាមេរិក។ រដ្ឋាភិបាលវ៉េណេស៊ុយអេឡា បានបដិសេធការចោទប្រកាន់ទាំងនេះ។