ប្រភពជាន់ខ្ពស់មួយដែលដឹងពីបញ្ហានេះ បានប្រាប់សារព័ត៌មានមួយកាលពីថ្ងៃសុក្រ (ទី១២ ខែធ្នូ) ថា ប្រទេសអ៊ុយក្រែននឹងចូលរួមជាមួយសហភាពអឺរ៉ុប (EU) យ៉ាងឆាប់នៅខែមករា ឆ្នាំ២០២៧ ក្រោមផែនការចុងក្រោយរបស់សហរដ្ឋអាមេរិក ដើម្បីបញ្ចប់សង្រ្គាមជាមួយរុស្ស៊ី។

ដំណើរការចូលជាសមាជិក EU ដ៏ស្មុគស្មាញ ជាធម្មតាត្រូវចំណាយពេលជាច្រើនឆ្នាំ ហើយតម្រូវឲ្យមានការបោះឆ្នោតជាឯកច្ឆន្ទពីសមាជិកទាំង ២៧ របស់ប្លុក ហើយប្រទេសមួយចំនួន ជាពិសេសហុងគ្រី បានបង្ហាញការប្រឆាំងជាប់ជានិច្ច ចំពោះការចូលរួមរបស់អ៊ុយក្រែន។

គំនិតនៃការចូលរួបរួមយ៉ាងរហ័ស ត្រូវបានរួមបញ្ចូលនៅក្នុងកំណែចុងក្រោយបំផុតនៃផែនការដែលដឹកនាំដោយសហរដ្ឋអាមេរិក ដើម្បីបញ្ចប់សង្រ្គាម ដែលក៏នឹងឃើញអ៊ុយក្រែនព្រមលះបង់ដែនដីទៅឲ្យរុស្ស៊ីផងដែរ និងដែលបានបង្កឲ្យមានភាពច្របូកច្របល់ផ្នែកការទូត នៅទូទាំងទ្វីបអឺរ៉ុប ក្នុងប៉ុន្មានសប្តាហ៍ថ្មីៗនេះ។

ដោយសំដៅទៅលើផែនការរបស់សហរដ្ឋអាមេរិក មន្ត្រីជាន់ខ្ពស់ដែលនិយាយក្នុងលក្ខខណ្ឌមិនបញ្ចេញឈ្មោះនោះ បានប្រាប់ថា៖ «វា (ដំណើរការ) ត្រូវបានបញ្ជាក់ ប៉ុន្តែវាជាបញ្ហា សម្រាប់ការចរចា ហើយអាមេរិកគាំទ្រវា»។

លោកប្រធានាធិបតី Volodymyr Zelenskyy បានប្រាប់អ្នកសារព័ត៌មាន កាលពីថ្ងៃព្រហស្បតិ៍ថា ទីក្រុងវ៉ាស៊ីនតោន មានឥទ្ធិពលគ្រប់គ្រាន់ ដើម្បីបញ្ចុះបញ្ចូលមេដឹកនាំដែលប្រឆាំងនឹងសមាជិកភាពរបស់អ៊ុយក្រែនឲ្យផ្លាស់ប្តូរជំហររបស់ពួកគេ។

គួរបញ្ជាក់ថា ទីក្រុងគីវបានប្រឹងប្រែងជាយូរមកហើយ ក្នុងការចូលជាសមាជិក EU ហើយបាននិងកំពុងអនុវត្តកំណែទម្រង់ ចាប់តាំងពីមានបដិវត្តន៍គាំទ្រអឺរ៉ុបឆ្នាំ២០១៤ ប៉ុន្តែបានជួបការលំបាកក្នុងការលុបបំបាត់អំពើពុករលួយដែលរាលដាល ជាតម្រូវការស្នូល ដើម្បីបានចូលរួមជាមួយប្លុកនេះ៕