ទូរទស្សន៍រដ្ឋកូរ៉េខាងជើង KRT រាយការណ៍កាលពីថ្ងៃសៅរ៍ថា មេដឹកនាំកូរ៉េខាងជើងលោក Kim Jong Un បានចូលរួមពិធីស្វាគមន៍ សម្រាប់អង្គភាពវីស្វកម្មកងទ័ពកូរ៉េខាងជើងដែលបានវិលត្រឡប់មកកាន់ប្រទេសកំណើតវិញ ក្រោយបំពេញការងារនៅរុស្ស៊ី ។

នៅក្នុងសុន្ទរកថាចុះផ្សាយដោយទីភ្នាក់ងារព័ត៌មានផ្លូវការកូរ៉េខាងជើង KCNA លោក Kimបានកោតសរសើរដល់ក្រុមមន្រ្តី និងទាហានកងវរសេនាធំវិស្វកម្ម លេខ ៥២៨នៃកងទ័ពប្រជនកូរ៉េ សម្រាប់វីរភាពរបស់ពួកគេក្នុងការបំពេញបទបញ្ជាពីគណបក្សកាន់អំណាចពលករកូរ៉េ អំឡុងការដាក់ពង្រាយរយៈពេល ១២០ថ្ងៃនៅក្រៅប្រទេស ។

រូបភាពវីដេអូឃ្លីបចេញដោយកូរ៉េខាងជើង ឃើញទាហានស្លៀកពាក់ឯកសណ្ឋាណ ចុះពីលើយន្តហោះ លោក Kimឱបទាហានម្នាក់អង្គុយលើកៅអីរុញ ហើយទាហាន និងក្រុមមន្រ្តីជួបជុំគ្នា ស្វាគមន៍ទាហានដែលវិលត្រឡប់ពីក្រៅប្រទេសវិញ ។

KCNA រាយការណ៍ថា អង្គភាពនេះ ត្រូវបានបញ្ជូនទៅកាន់រុស្ស៊ីកាលពីដើមខែសីហា ហើយនិងចូលរួមប្រយុទ្ធ និងបំពេញការងារវីស្វកម្មនៅតំបន់ Kursk របស់រុស្ស៊ី អំឡុងសង្រ្គាមជាមួយអ៊ុយក្រែន ។

កាលពីខែមុន ក្រសួងការពារជាតិរុស្ស៊ី បាននិយាយថា ទាហានកូរ៉េខាងជើងដែលបានជួយរុស្ស៊ីរុញច្រានការវាយប្រហារទ្រង់ទ្រាយធំរបស់អ៊ុយក្រែនចូលទៅក្នុងតំបន់ភាគខាងលិច Kursk របស់ខ្លួន បច្ចុប្បន្នដើរតួយ៉ាងសំខាន់ ក្នុងការបោសសម្អាតមីននៅទីនោះ ។

យោងតាមប្រភពពីកូរ៉េខាងត្បូង អ៊ុយក្រែន និងលោកខាងលិច បានឲ្យដឹងថា ក្រោមកិច្ចព្រមព្រៀងការពារគ្នាទៅវិញទៅមករវាងប្រទេសទាំង ២ កូរ៉េខាងជើងកាលពីឆ្នាំមុន បានបញ្ជូនទាហានប្រហែល ១៤.០០០នាក់ ដើម្បីប្រយុទ្ធជាមួយទាហានរុស្ស៊ីនៅតំបន់ Kursk ហើយទាហាន ៦ពាន់នាក់របស់ពួកគេ ត្រូវបានសម្លាប់ ៕