យោធាអាមេរិកនិយាយថា ប្រធានាធិបតីសហរដ្ឋអាមេរិកលោក Donald Trump បានថ្កោលទោសការវាយប្រហារដែលបានសម្លាប់ទាហានអាមេរិក ២នាក់ និងអ្នកបកប្រែស៊ីវិលម្នាក់កាលពីថ្ងៃសៅរ៍ ពេលដែលជនវាយប្រហាររដ្ឋអ៊ិស្លាមសង្ស័យ មានគោលដៅលើក្បួនរថយន្តរបស់កងកម្លាំងអាមេរិក និងកងកម្លាំងស៊ីរី ។

 មន្រ្តីក្នុងស្រុក ៣នាក់ និយាយប្រាប់ទីភ្នាក់ងារព័ត៌មានរ៉យទ័រថា ជនវាយប្រហារគឺជាសមាជិករបស់កងកម្លាំងសន្តិសុខស៊ីរី ប៉ុន្តែអ្នកនាំពាក្យក្រសួងមហាផ្ទៃស៊ីរី និយាយប្រាប់ទូរទស្សន៍រដ្ឋថា បុរសម្នាក់នោះ ពុំមានតួលនាទីក្នុងកងកម្លាំងសន្តិសុខនោះទេ ។

 ទីបញ្ជាការកណ្តាលយោធាសហរដ្ឋអាមេរិក និយាយថា ទាហានសហរដ្ឋអាមេរិក ៣នាក់ បានរងរបួសផងដែរនៅក្នុងការវាយប្រហារនេះ ។

 នៅក្នុងសេចក្តីថ្លែងការណ៍ ទីបញ្ជាការកណ្តាលអាមេរិកនិយាយថា ការវាយប្រហារដែលធ្វើឡើងដោយខ្មាន់កាំភ្លើងតែម្នាក់ឯងនេះ បានកើតឡើង ពេលដែលទាហានចូលរួមអន្តរកម្មជាមួយអ្នកដឹកនាំសំខាន់ៗនៅទីក្រុងភាគកណ្តាល Palmyra របស់ប្រទេសស៊ីរី ។

 រដ្ឋមន្រ្តីការពារជាតិសហរដ្ឋអាមេរិកលោក Pete Hegseth និយាយនៅលើបណ្តាញព័ត៌មានសង្គមថា កងកម្លាំងជាដៃគូ បានបាញ់សម្លាប់ខ្មាន់កាំភ្លើងនោះ ។

 មន្រ្តីជាន់ខ្ពស់មួយរូបរបស់សហរដ្ឋអាមេរិក និយាយថា ការវាយតម្លៃដំបូងបង្ហាញថា រដ្ឋអ៊ិស្លាមប្រហែលជាបានបើកការវាយប្រហារនេះ បើទោះបីជាក្រុមជីវពលមួយនេះ ពុំបានប្រកាសទទួលស្គាល់ភ្លាមៗក៏ដោយ ។ វាបានកើតឡើងនៅតំបន់ដែលពុំបានគ្រប់គ្រងដោយរដ្ឋាភិបាលស៊ីរី ៕