ព្រិល និងខ្យល់ កំពុងកើនឡើងពីភាគខាងជើងឆ្លងកាត់ប្រទេសជប៉ុនភាគកណ្តាល។ មន្ត្រីអាកាសធាតុកំពុងព្រមានដល់ប្រជាជននៅក្នុងខេត្តហុកកៃដូភាគខាងជើងផុតរបស់ប្រទេសអំពីព្យុះព្រិល ព្រិលធ្លាក់និងខ្យល់បក់ខ្លាំង។

ទីភ្នាក់ងារឧតុនិយមរបស់ប្រទេសជប៉ុននិយាយថា ប្រព័ន្ធសម្ពាធទាបចំនួនពីរដែលកំពុងវិវឌ្ឍយ៉ាងឆាប់រហ័សកំពុងវាយប្រហារតំបន់ Tohoku ភាគឦសាន។ ទីភ្នាក់ងារនេះនិយាយថា វាកំពុងបញ្ជូនខ្យល់បក់ខ្លាំងទៅកាន់តំបន់នានាពីកោះហុកកៃដូ ឆ្លងកាត់ភាគខាងកើតប្រទេសជប៉ុន។

សន្ទុះខ្យល់បក់បានកត់ត្រាល្បឿនប្រហែល១៦២គីឡូម៉ែត្រក្នុងមួយម៉ោងនៅតំបន់ Cape Erimo ភាគខាងត្បូងកោះហុកកៃដូ។ ខ្យល់បក់ ក៏បានកើនឡើងដល់ប្រហែល១១១គីឡូម៉ែត្រក្នុងមួយម៉ោងនៅក្នុងទីក្រុងNemuro ភាគខាងកើតកោះហុកកៃដូ និងប្រហែល៩៧គីឡូម៉ែត្រក្នុងមួយម៉ោងនៅក្នុងក្រុង Sakata ខេត្តYamagata។ កោះហុកកៃដូ កំពុងទទួលរងព្រិលធ្លាក់ខ្លាំង។ ព្រិលធ្លាក់ក្នុងរយៈពេល៦ម៉ោងរហូតដល់ម៉ោង១០យប់ថ្ងៃអាទិត្យបានឡើងដល់៣៦សង់ទីម៉ែត្រនៅក្នុងទីក្រុង Obihiro និង៣៤សង់ទីម៉ែត្រនៅក្នុងទីក្រុងHiroo។ ព្រិលធ្លាក់រយៈពេល២៤ម៉ោងរហូតដល់ល្ងាចថ្ងៃច័ន្ទនេះអាចកើនឡើងដល់៨០សង់ទីម៉ែត្រនៅក្នុងតំបន់មួយចំនួននៃកោះហុកកៃដូ។

ទីភ្នាក់ងារនេះនិយាយថាអាកាសធាតុអាចប្រែទៅជាគ្រោះថ្នាក់ខ្លាំងសម្រាប់ប្រជាជននៅកោះហុកកៃដូក្នុងការចេញទៅខាងក្រៅ។ ទីភ្នាក់ងារនេះ កំពុងជំរុញឱ្យប្រជាជនប្រុងប្រយ័ត្នខ្ពស់បន្ថែមដើម្បីទប់ទល់ព្យុះព្រិល ព្រិលធ្លាក់និងខ្យល់បក់ខ្លាំង ព្រមទាំងការរំខានដល់ប្រព័ន្ធដឹកជញ្ជូន។ មន្ត្រីក៏បាននិយាយផងដែរថា បំណាក់ដី និងការដាច់ចរន្តអគ្គិសនី អាចកើតឡើង។