នៅថ្ងៃចន្ទ (១៥ ធ្នូ) នេះ បណ្ដាមេដឹកនាំអឺរ៉ុប ត្រូវបានគេរំពឹងថា នឹងបើកជំនួបកំពូលមួយនៅទីក្រុងប៊ែរឡាំង ដើម្បីពង្រឹងការគាំទ្រដល់អ៊ុយក្រែន ខណៈទីក្រុងគីវ ប្រឈមនឹងសម្ពាធរបស់ទីក្រុងវ៉ាស៊ីនតោន ឱ្យទទួលយកកិច្ចព្រមព្រៀងសន្តិភាពដែលសម្របសម្រួលដោយសហរដ្ឋអាមេរិក ឱ្យបានឆាប់។

បន្ទាប់ពីកិច្ចពិភាក្សាកាលពីថ្ងៃអាទិត្យនៅអាល្លឺម៉ង់ រវាងប្រេសិតអាមេរិក និងលោកប្រធានាធិបតីអ៊ុយក្រែន Volodymyr Zelenskyy មន្ត្រីអ៊ុយក្រែន និងអឺរ៉ុប ត្រៀមបើកកិច្ចប្រជុំជាបន្តបន្ទាប់ ក្នុងកិច្ចខិតខំប្រឹងប្រែងដើម្បីធានាសន្តិភាព និងសន្តិសុខរបស់ទ្វីបអឺរ៉ុប តតាំងនឹងរុស្ស៊ី។

សហរដ្ឋអាមេរិក បានព្យាយាមអស់ជាច្រើនខែមកហើយ ដើម្បីដោះស្រាយបញ្ហាទាមទាររបស់ភាគីនីមួយៗ ខណៈលោកប្រធានាធិបតីអាមេរិក Donald Trump កំពុងជំរុញឱ្យបញ្ចប់សង្គ្រាមរបស់រុស្ស៊ី ឱ្យបានឆាប់។ ដំណើរស្វែងរកសន្តិភាព កំពុងជួបប្រទះនឹងឧបសគ្គធំៗមួយចំនួន រួមទាំងការគ្រប់គ្រងទឹកដីតំបន់ Donetsk ភាគខាងកើតរបស់អ៊ុយក្រែន។

ក្នុងកិច្ចពិភាក្សាកាលពីថ្ងៃអាទិត្យ លោក Zelenskyy បានសម្តែងការត្រៀមខ្លួនជាស្រេច ក្នុងការបោះបង់ចោលគោលដៅចូលរួមជាមួយអង្គការណាតូ ប្រសិនបើអាមេរិក និងប្រទេសលោកខាងលិចដទៃទៀត ផ្តល់ការធានាសន្តិសុខដល់អ៊ុយក្រែន ស្រដៀងនឹងការធានាដែលផ្តល់ជូនសមាជិកអង្គការណាតូ។ យ៉ាងណាមិញ អ៊ុយក្រែន នៅតែបន្តបដិសេធ មិនយល់ព្រមប្រគល់ទឹកដីរបស់ខ្លួនទៅឱ្យរុស្ស៊ីឡើយ៕