អ៊ីស្រាអែល និងក្រុមហាម៉ាស បានដាក់ការស្តីបន្ទោសគ្នាទៅវិញទៅមកចំពោះការពន្យាពេលដំណាក់កាលទី ២នៃផែនការសន្តិភាពគាំទ្រដោយសហរដ្ឋអាមេរិកនៅតំបន់ហ្កាហ្សា ។

ការចោទប្រកាន់នេះ បានកើតមានឡើងកាលពីថ្ងៃអាទិត្យ បន្ទាប់ពីការសម្លាប់មេបញ្ជាការជាន់ខ្ពស់មួយរូបរបស់ក្រុមហាម៉ាស នៅជិតទីក្រុងហ្កាហ្សា ខណៈអ៊ីស្រាអែលនិយាយថា ក្រុមជីវពលប៉ាឡេស្ទីនមួយនេះ បដិសេធន៍មិនព្រមប្រគល់សាកសពរបស់ចំណាប់ថ្នូរចុងក្រោយ ហើយនិងព្យាយាមបង្កើតយោធាឡើងវិញ ។

នៅក្នុងសេចក្តីថ្លែងការណ៍ជាវីដេអូបញ្ចេញកាលពីថ្ងៃអាទិត្យ ប្រធានក្រុមហាម៉ាសនៅហ្កាហ្សាលោក Khalil al-Hayya បានបញ្ជាក់ពីការសម្លាប់មេបញ្ជាការជាន់ខ្ពស់មួយរូបរបស់ពួកគេ គឺលោក Raed Saad នៅក្នុងការវាយប្រហាររបស់អ៊ីស្រាអែលកាលពីរយៈពេល ១ថ្ងៃមុន ។ លោកបានចោទប្រកាន់អ៊ីស្រាអែលថាបំពានបទឈប់បាញ់ និងធ្វើឲ្យគ្រោះថ្នាក់ដល់ផែនការសន្តិភាពរៀបចំឡើងដោយសហរដ្ឋអាមេរិក ។

ក្រុមអាជ្ញាធរសុខភាពហ្កាហ្សា និយាយថា ការវាយប្រហាររបស់យោធាអ៊ីស្រាអែលនៅទីក្រុងហ្កាហ្សា បានសម្លាប់មនុស្ស ៤នាក់ និងមនុស្ស ៦នាក់ផ្សេងទៀត រងរបួស ។

យោងតាមការអះអាងរបស់មន្រ្តីការពារជាតិអ៊ីស្រាអែល និងសារព័ត៌មានអ៊ីស្រាអែល បានឲ្យដឹងថា កាលពីថ្ងៃសៅរ៍ យោធាអ៊ីស្រាអែល បានវាយប្រហាររថយន្តមួយគ្រឿងនៅទីក្រុងហ្កាហ្សាដឹកមេបញ្ជាការក្រុមហាម៉ាសលោក Raed Saed ដែលស្ថិតក្នុងចំណោមស្ថាបនិកបើកការវាយប្រហារលើអ៊ីស្រាអែល កាលពីថ្ងៃទី ៧ ខែតុលា ឆ្នាំ ២០២៣ ។

សូមបញ្ជាក់ថា សង្រ្គាមហ្កាហ្សា បានចាប់ផ្តើម ក្រោយក្រុមជីវពលហាម៉ាស សម្លាប់មនុស្ស ១.២០០នាក់ ដែលភាគច្រើននៃពួកគេគឺជាជនស៊ីវិល និងចាប់ចំណាប់ថ្នូរ ២៥១នាក់ នៅក្នុងការវាយប្រហារលើតំបន់ភាគខាងត្បូងអ៊ីស្រាអែលកាលពីឆ្នាំ ២០២៣ ។

 ក្រុមមន្រ្តីសុខភាពនៅតំបន់ហ្កាហ្សា និយាយថា ការវាយប្រហារសងសឹករបស់អ៊ីស្រាអែល បានសម្លាប់មនុស្សជាង ៧០.៧០០នាក់ ដែលភាគច្រើននៃពួកគេគឺជាជនស៊ីវិល ៕