កាយវប្បកម្ម៖ លោក តឹក ប៊ុនវី ប្រធានសហព័ន្ធកីឡាកាយវប្បកម្ម និងលំហាត់ប្រាណកម្ពុជា បានចាត់ទុកវគ្គបណ្ដុះបណ្ដាលគ្រូកីឡាកាយវប្បកម្មថ្នាក់ជាតិកម្រិតមូលដ្ឋានឆ្នាំ២០២២ គឺជាវគ្គដ៏មានសារៈសំខាន់ និងមានប្រយោជន៍ក្នុងការពង្រឹង និងពង្រីកនូវធនធានមនុស្ស សម្រាប់ធ្វើការអភិវឌ្ឍន៍វិស័យនេះឲ្យកាន់តែរីកចម្រើន និងទទួលបានលទ្ធផលល្អ ទាំងក្នុងការប្រកួតថ្នាក់ជាតិ និងអន្ដរជាតិនានា។
ការលើកឡើងនេះ បន្ទាប់ពីសហព័ន្ធបានរៀបចំវគ្គបណ្ដុះបណ្ដាលនេះរយៈពេល ៥ថ្ងៃកាលពីសប្ដាហ៍មុនដោយមានសិក្ខាកាមចូលរួម ៣០នាក់មកពីបណ្ដាសមាគម/ក្លិបដែលជាសមាជិកសហព័ន្ធ នៅទីស្នាក់ការសហព័ន្ធកីឡាកាយវប្បកម្ម និងលំហាត់ប្រាណកម្ពុជានៅផ្សារសំណង់១២។ ប្រមុខសហព័ន្ធដដែលបានបញ្ជាក់ថា វគ្គនេះបានផ្ដោតសំខាន់លើការប្រើប្រាស់របបអាហារ ការហ្វឹកហាត់ ក្រុមសីលធម៌របស់គ្រូបង្វឹក និងការអនុវត្តជាក់ស្ដែង ដែលលោករំពឹងថា បន្ទាប់ពីបញ្ចប់ការសិក្សានេះ សិក្ខាកាមនឹងយកចំណេះដឹងដែលខ្លួនទទួលបាន ទៅចែករំលែក និងបង្ហាត់ដល់កូនសិស្សឲ្យត្រឹមត្រូវតាមក្រឹត្យក្រមនៃកីឡាកាយវប្បកម្ម ដើម្បីក្លាយជាកីឡាករតំណាងជាតិ ហើយចូលរួមការប្រកួតជាតិ និងអន្ដរជាតិនានា ពិសេសការប្រកួតស៊ីហ្គេម ២លើកចំពោះមុខតែម្ដង។
សូមបញ្ជាក់ថា ពិធីបិទវគ្គបណ្ដុះបណ្ដាលនេះធ្វើឡើងក្រោមវត្តមានលោក ទុយ ប៊ុនហឿន អនុប្រធាននាយកដ្ឋានអប់រំកាយ និងកីឡានៃក្រសួងអប់រំយុវជន និងកីឡា។ ចំពោះលទ្ធផលនៃការសិក្សារបស់សិក្ខាកាម ក្រោយសិក្សាទាំងទ្រឹស្ដី និងការអនុវត្តផ្ទាល់រយៈពេល ៥ថ្ងៃសម្រាប់សិក្ខាកាមទទួលបាននិទ្ទេសល្អណាស់មានចំនួន ៨នាក់, និទ្ទេសល្អមានចំនួន ១៧នាក់ និងនិទ្ទេសមធ្យមចំនួន ៥នាក់៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
