រូបភាពផ្កាយរណបដែលត្រូវបានពិនិត្យឡើងវិញដោយទីភ្នាក់ងារត្រួតពិនិត្យការពិត Sanad របស់សារព័ត៌មាន Al Jazeera បង្ហាញឲ្យឃើញ យោធាអ៊ីស្រាអែលបានបន្តរុះរើអគារនៅក្នុងតំបន់ហ្កាហ្សាដែលខ្លួនបានចូលកាន់កាប់ចាប់តាំងពីបទឈប់បាញ់ជាមួយក្រុមហាម៉ាសចូលជាធរមាន។

ក្រុមប៉ាឡេស្ទីន បានរិះគន់ការរុះរើបែបនេះថាជាការរំលោភលើកិច្ចព្រមព្រៀងបទឈប់បាញ់ ដែលបានចូលជាធរមានកាលពីថ្ងៃទី១០ ខែតុលា។ អ្នកជំនាញផ្នែកច្បាប់ និងមន្ត្រីអង្គការសហប្រជាជាតិ បាននិយាយថា ការបំផ្លាញហេដ្ឋារចនាសម្ព័ន្ធស៊ីវិល អាចបង្កើតជាឧក្រិដ្ឋកម្មសង្គ្រាម។

កាលពីពេលមុនមន្ត្រីយោធាអ៊ីស្រាអែល បាននិយាយថា សកម្មភាពបែបនេះត្រូវបានធ្វើឡើងនៅក្នុងក្របខ័ណ្ឌនៃបទឈប់បាញ់ និងជាការឆ្លើយតបទៅនឹងការគំរាមកំហែងដ៏សកម្ម។

អ៊ីស្រាអែល នៅតែគ្រប់គ្រងប្រហែល៥៨ភាគរយនៃតំបន់ហ្កាហ្សាចាប់តាំងពីបទឈប់បាញ់បានចាប់ផ្តើម ដោយបានដកថយនៅពីក្រោយអ្វីដែលគេហៅថា «បន្ទាត់លឿង» បែងចែកហ្កាហ្សាតំបន់ឆ្នេរសមុទ្រពីតំបន់ព្រំដែនរបស់ខ្លួន។

រូបភាពផ្កាយរណបបានបង្ហាញថា ការរុះរើចុងក្រោយបំផុតបានធ្វើឡើងនៅចន្លោះថ្ងៃទី៥ ខែវិច្ឆិកា និងថ្ងៃទី១៣ ខែធ្នូ។

រូបភាពទាំងនេះទំនងជាបានបង្ហាញពីការរុះរើនៅក្នុងទីក្រុងRafahភាគខាងត្បូង ព្រមទាំងការបំផ្លិចបំផ្លាញជាក់ស្តែងនៃតំបន់កសិកម្មនៅភាគខាងកើតទីក្រុង Deir el-Balah ទីក្រុងហ្កាហ្សាភាគកណ្តាល។