ប្រទេសលីបង់បានប្រកាសកាលពីថ្ងៃចន្ទថា ជនភៀសខ្លួនស៊ីរីចំនួន ៣៨០.០០០ នាក់ បានវិលត្រឡប់ទៅប្រទេសកំណើតរបស់ពួកគេវិញ ក្រោមផែនការសម្របសម្រួលដោយរដ្ឋាភិបាល ដែលបានចាប់ផ្តើមនៅក្នុងខែកក្កដា ឆ្នាំ ២០២៥។

រដ្ឋមន្ត្រីក្រសួងសង្គមកិច្ច លោកស្រី Haneen Sayed បាននិយាយនៅលើវេទិកាប្រព័ន្ធផ្សព្វផ្សាយសង្គម X ថា ជនភៀសខ្លួនទាំងនោះ ត្រូវបានដកចេញជាអចិន្ត្រៃយ៍ពីទិន្នន័យចុះឈ្មោះរបស់ទីភ្នាក់ងារជនភៀសខ្លួនអង្គការសហប្រជាជាតិ។ ជនភៀសខ្លួនបន្ថែមចំនួន ៧៤.០០០ នាក់ បានបង្ហាញពីចេតនារបស់ពួកគេ ក្នុងការវិលត្រឡប់ទៅវិញ នៅមុនដំណាច់ឆ្នាំនេះ។

លោកស្រី Sayed បាននិយាយថា នេះឆ្លុះបញ្ចាំងពី «ការប្តេជ្ញាចិត្តដ៏ម៉ឺងម៉ាត់របស់រដ្ឋាភិបាលលីបង់ ក្នុងការធានាការវិលត្រឡប់របស់ជនភៀសខ្លួនទៅកាន់ប្រទេសស៊ីរីប្រកបដោយចីរភាព» ក៏ដូចជា «ប្រសិទ្ធភាពនៃភាពជាដៃគូដែលមានស្រាប់» ជាមួយដៃគូជាតិ និងអន្តរជាតិ។

ប្រទេសលីបង់ ដែលជាប្រទេសមួយក្នុងចំណោមប្រទេសដែលមានចំនួនជនភៀសខ្លួនច្រើនជាងគេបំផុតក្នុងពិភពលោក បានជជែកវែកញែកជាយូរមកហើយថា វត្តមានរបស់ជនភៀសខ្លួនស៊ីរីជាង ២ លាននាក់ ធ្វើឲ្យប៉ះពាល់ដល់សេវាសាធារណៈ សេដ្ឋកិច្ច និងសាមគ្គីភាពសង្គមរបស់ខ្លួន។

ក្នុងរយៈពេលប៉ុន្មានឆ្នាំចុងក្រោយនេះ រដ្ឋាភិបាលលីបង់បានបង្កើនការអំពាវនាវឲ្យមានការវិលត្រឡប់របស់ជនភៀសខ្លួនជាអាទិភាពជាតិ។ ទោះជាយ៉ាងណាក៏ដោយ អង្គការមនុស្សធម៌បានសង្កត់ធ្ងន់ថា ការវិលត្រឡប់ណាមួយ ត្រូវតែធ្វើឡើងដោយស្ម័គ្រចិត្ត មានសុវត្ថិភាព និងថ្លៃថ្នូរ ដោយកត់សម្គាល់ថា លក្ខខណ្ឌនៅក្នុងប្រទេសស៊ីរី នៅតែជាបញ្ហាប្រឈម៕