អង្គការសហប្រជាជាតិ (UN) បានកាត់បន្ថយពាក់កណ្តាលនូវរបបអាហារ សម្រាប់ប្រជាជន នៅតំបន់ហ្កាហ្សា ដោយលើកឡើងពីការរឹតបន្តឹងរបស់អ៊ីស្រាអែល ដែលបន្តប៉ះពាល់ដល់កិច្ចប្រឹងប្រែងមនុស្សធម៌របស់ស្ថាប័ន។

បើយោងតាមអ្នកនាំពាក្យ UN លោក Farhan Haq បានប្រាប់អ្នកសារព័ត៌មានកាលពីថ្ងៃចន្ទ (ទី១៥ ខែធ្នូ) ថា រយៈពេលប៉ុន្មានខែកន្លងមកនេះ UN និងដៃគូមនុស្សធម៌របស់ខ្លួន អាចមានលទ្ធភាពផ្ដល់ជំនួយទៅកាន់តំបន់ហ្កាហ្សា ដោយមានកម្រិតមួយចំនួនពីសំណាក់អាជ្ញាធរអ៊ីស្រាអែល ប៉ុន្តែនៅថ្ងៃទី១២ ខែធ្នូ ស្ថាប័នទាំងនោះបានកាត់បន្ថយចំណែកអាហារពាក់កណ្តាលដែលកំពុងត្រូវបានចែកចាយ។

លោកបានបន្តថា៖ «ដោយសារតែការរឹតបន្តឹងបន្តប៉ះពាល់ដល់សមត្ថភាពរបស់ពួកយើង ក្នុងការនាំយកជំនួយក្នុងបរិមាណគ្រប់គ្រាន់ទៅចែកចាយ ដៃគូរបស់យើង ជាថ្មីម្ដងទៀតត្រូវកាត់បន្ថយជំនួយដែលកំពុងត្រូវបានផ្តល់ជូន សម្រាប់អីវ៉ាន់មួយកញ្ចប់ដែលមានម្សៅមួយថង់ និងនំប៊ីសស្ទីនថាមពលខ្ពស់ ១,៥គីឡូក្រាម»។

លោក Haq បានបន្ថែមថា លោកបានស្តីបន្ទោសការរឹតបន្តឹងរបស់អ៊ីស្រាអែល នៅចំណុចឆ្លងកាត់ដែលជំនួយចូលទៅតំបន់ហ្កាហ្សា ប្រភេទទំនិញដែលអាចចូល និងកំណត់ចំនួនទិដ្ឋាការបុគ្គលិកមនុស្សធម៌។ លោកបាននិយាយថា៖ «ទាំងនេះជាការរឹតត្បិតជាច្រើន ដែលបានធ្វើឡើងដោយអាជ្ញាធរអ៊ីស្រាអែល។ យើងបានព្យាយាមផ្ដល់ជំនួយឲ្យបានច្រើនតាមដែលយើងអាចធ្វើបាន»។

បេសកកម្មអ៊ីស្រាអែលប្រចាំ UN មិនបានឆ្លើយតបភ្លាមៗឡើយ ចំពោះសំណើសុំការអត្ថាធិប្បាយ។ ការកាត់បន្ថយយ៉ាងខ្លាំងនូវជំនួយស្បៀងអាហារដល់តំបន់នេះ គូសបញ្ជាក់ពីភាពផុយស្រួយនៃប្រតិបត្តិការមនុស្សធម៌ នៅតំបន់ហ្កាហ្សា ពោលគឺ ២ខែបន្ទាប់ពីបទឈប់បាញ់ បានបើកផ្លូវ ដើម្បីឲ្យអ៊ីស្រាអែលព្រមអនុញ្ញាតឲ្យមានធនធានបន្ថែមទៀតចូលទៅក្នុងតំបន់ឆ្នេរនេះ៕