អត្រាអ្នកគ្មានការងារធ្វើក្នុងសហរដ្ឋអាមេរិក កើនឡើងដល់ ៤,៦% ក្នុងខែវិច្ឆិកា កន្លងទៅ ដែលជាកម្រិតខ្ពស់បំផុតចាប់តាំងពីខែតុលា ឆ្នាំ២០២១ មក យោងតាមទិន្នន័យចេញផ្សាយដោយការិយាល័យស្ថិតិការងារសហរដ្ឋអាមេរិក កាលពីថ្ងៃអង្គារ (១៦ ធ្នូ) ដែលជាសញ្ញាព្រមានមួយសម្រាប់សុខភាពទីផ្សារការងារ ដែលរងផលប៉ះពាល់ពីការបញ្ឈប់បុគ្គលិកសហព័ន្ធ និងកំណើនថ្លៃចំណាយប្រចាំថ្ងៃ។

គិតជាតួលេខក្នុងខែវិច្ឆិកា ចំនួនអ្នកអត់ការងារធ្វើនៅអាមេរិក មានប្រហែល ៧,៨៣លាននាក់ ពោលគឺ ខ្ពស់ជាងចំនួន ៧,១២លាននាក់ ក្នុងរយៈពេលដូចគ្នានៃឆ្នាំ២០២៤។ ទិន្នន័យក៏បង្ហាញថា វិស័យមិនមែនកសិកម្ម របស់អាមេរិក បានបន្ថែមការងារចំនួន ៦៤.០០០នាក់ប៉ុណ្ណោះ កាលពីខែមុន ខណៈការបាត់បង់ការងារប្រចាំខែ ត្រូវកត់ត្រាយ៉ាងច្រើនក្នុងវិស័យដឹកជញ្ជូន ឃ្លាំងទំនិញ និងសហព័ន្ធ។

សេតវិមានបានព្យាយាមនិយាយសម្រាលរបាយការណ៍ការងារដ៏អាក្រក់នេះ ថាជាសញ្ញានៃវឌ្ឍនភាពសេដ្ឋកិច្ច។ អ្នកនាំពាក្យសេតវិមាន លោកស្រី Karoline Leavitt បានលើកសរសើរទិន្នន័យនេះថាជាសញ្ញានៃ «សេដ្ឋកិច្ចដ៏រឹងមាំ និងយកជនជាតិអាមេរិកជាធំ» ដោយលើកពីកំណើនក្នុងវិស័យឯកជន។

សេដ្ឋវិទូបានលើកឡើងថា របាយការណ៍ការងារចុងក្រោយបំផុតនេះ ទំនងជាមិនអាចបញ្ចុះបញ្ចូលអ្នកបង្កើតគោលនយោបាយក្នុងគណៈកម្មាធិការទីផ្សារបើកចំហរបស់ធនាគារកណ្ដាលអាមេរិក ឱ្យបន្ធូរគោលនយោបាយរូបិយវត្ថុ និងកាត់បន្ថយអត្រាការប្រាក់ នៅក្នុងកិច្ចប្រជុំបន្ទាប់របស់ខ្លួនបានទេ៕