កសិករនៅប្រទេសស្លូវេនីកាលពីថ្ងៃអង្គារ ទី១៦ ខែធ្នូ បានត្រៀមខ្លួនចូលរួមជាមួយសមភាគីមកពីទូទាំងសហភាពអឺរ៉ុប(EU) ក្នុងការតវ៉ាទ្រង់ទ្រាយធំនៅទីក្រុងព្រុចសែលនៅចុងសប្តាហ៍នេះដើម្បីប្រឆាំងការកាត់មូលនិធិកសិកម្មរបស់សហភាពអឺរ៉ុប និងកិច្ចព្រមព្រៀងពាណិជ្ជកម្មដែលអាចកើតមានជាមួយប្លុកពាណិជ្ជកម្មទីផ្សាររួមអាមេរិកឡាទីន។

លោក Bostjan Slamensek ជាកសិករម្នាក់ដែលកំពុងត្រៀមចូលរួមក្នុងក្រុមមួយដោយបើកបរពីប្រទេសស្លូវេនីភាគកណ្តាលទៅកាន់ទីក្រុងព្រុចសែល ជាការធ្វើដំណើរជាង១.២០០គីឡូម៉ែត្រ បាននិយាយថា ពួកគេនឹងប្រើត្រាក់ទ័រតូចៗដើម្បីតំណាងឱ្យកសិករខ្នាតតូចដែល «ផ្ទុកបន្ទុកធ្ងន់»។

កសិករម្នាក់ទៀតបាននិយាយថា បណ្តាមេដឹកនាំគួរតែសួរខ្លួនឯងថាតើការសម្រេចចិត្តផ្នែកនយោបាយជុំវិញឧស្សាហកម្មកសិកម្មគឺជា «មធ្យោបាយត្រឹមត្រូវសម្រាប់អឺរ៉ុប» ដែរឬទេ។

កសិករមកពីរដ្ឋជាច្រើនរបស់សហភាពអឺរ៉ុប ត្រូវបានគេរំពឹងថានឹងមកជួបជុំគ្នានៅទីក្រុងព្រុចសែលនៅថ្ងៃព្រហស្បតិ៍ ទី១៨ ខែធ្នូ ដោយមនុស្សជាច្រើនមានការព្រួយបារម្ភថា លំហូរនៃការនាំចូលមានតម្លៃទាបជាមួយនឹងច្បាប់បរិស្ថានមិនសូវតឹងរ៉ឹង ជាពិសេសផលិតផលសាច់គោ និងសាច់មាន់ អាចធ្វើឱ្យផលិតផលរបស់ពួកគេធ្លាក់ចុះនៅក្នុងទីផ្សារក្នុងស្រុក។

កិច្ចព្រមព្រៀងជាមួយក្រុមទីផ្សាររួមអាមេរិកឡាទីន នៃបណ្តាប្រទេសអាមេរិកឡាទីន គឺជាកិច្ចព្រមព្រៀងធំបំផុតដែលត្រូវបានសម្របសម្រួលដោយសហភាពអឺរ៉ុប ទាក់ទងនឹងការបន្ធូរបន្ថយការដំឡើងពន្ធ ហើយអ្នកគាំទ្រនិយាយថា វាផ្តល់នូវផ្លូវមួយដើម្បីគេចចេញពីការពឹងផ្អែកលើប្រទេសចិន និងការបន្ធូរបន្ថយពីផលប៉ះពាល់នៃការដំឡើងពន្ធរបស់លោកប្រធានាធិបតីសហរដ្ឋអាមេរិក Donald Trump។