ប្រធានាធិបតីវ៉េណេស៊ុយអេឡា លោក Nicolas Maduro បានថ្លែងនៅរដ្ឋធានីការ៉ាកាស កាលពីថ្ងៃអង្គារ (១៦ ធ្នូ) ដោយជំរុញឱ្យមានសន្តិភាព ក្នុងភាពតានតឹងបច្ចុប្បន្នជាមួយទីក្រុងវ៉ាស៊ីនតោន ប៉ុន្តែលោកក៏បានចោទសហរដ្ឋអាមេរិកថា កំពុងព្យាយាមក្រសោបយកធនធានធម្មជាតិរបស់វ៉េណេស៊ុយអេឡា បន្ទាប់ពីលោកប្រធានាធិបតី Donald Trump ចេញបញ្ជាឱ្យរាំងខ្ទប់ផ្លូវនាវាដឹកប្រេងរបស់វ៉េណេស៊ុយអេឡា ដែលរងទណ្ឌកម្ម។

លោក Maduro បាននិយាយថា បុគ្គលិកវិស័យប្រេងគួរតែរៀបចំការតវ៉ាជាអន្តរជាតិដើម្បីការពារពាណិជ្ជកម្មសេរី សម្រាប់ប្រេងរបស់វ៉េណេស៊ុយអេឡា ហើយលោកបានបដិសេធការចោទប្រកាន់របស់សហរដ្ឋអាមេរិក អំពីការជួញដូរគ្រឿងញៀនថាជា «ព័ត៌មានក្លែងក្លាយ»។

លោកបានបន្ថែមថា «ចក្រពត្តិនិយម និងហ្វាស៊ីសស្តាំនិយម ចង់ធ្វើអាណានិគមលើវ៉េណេស៊ុយអេឡា ដើម្បីដណ្តើមយកទ្រព្យសម្បត្តិប្រេង ឧស្ម័ន មាស និងរ៉ែផ្សេងៗទៀតរបស់ខ្លួន។ រដ្ឋាភិបាលវ៉េណេស៊ុយអេឡាបានស្បថយ៉ាងដាច់អហង្ការថា ការពារមាតុភូមិរបស់ខ្លួន ហើយនៅក្នុងប្រទេសនេះ សន្តិភាពនឹងទទួលបានជោគជ័យ»។

នៅថ្ងៃអង្គារដដែលនេះ លោកប្រធានាធិបតីអាមេរិក Trump បានបញ្ជាឱ្យមាន "ការបិទខ្ទប់ផ្លូវទាំងអស់ និងទាំងស្រុង" ចំពោះនាវាដឹកប្រេងដែលជាប់ទណ្ឌកម្ម មិនឱ្យចូលនិងចេញពីវ៉េណេស៊ុយអេឡាឡើយ នេះបើយោងតាមសារបង្ហោះលើបណ្ដាញសង្គម Truth Social។ កំណើនភាពតានតឹងបានកើតឡើង រយៈពេល ១សប្តាហ៍ប៉ុណ្ណោះ បន្ទាប់ពីអាមេរិក បានរឹបអូសនាវាដឹកប្រេងជាប់ទណ្ឌកម្ម ១គ្រឿង នៅឆ្នេរសមុទ្រវ៉េណេស៊ុយអេឡា៕