ប្រធានាធិបតីអ៊ុយក្រែន លោក Volodymyr Zelenskyy បាននិយាយកាលថ្ងៃអង្គារ (១៦ ធ្នូ) ថា សំណើសន្តិភាពដែលកំពុងចរចាជាមួយមន្ត្រីអាមេរិក សម្រាប់កិច្ចព្រមព្រៀងបញ្ចប់សង្រ្គាមជិត ៤ឆ្នាំរបស់រុស្ស៊ី អាចនឹងរួចរាល់ក្នុងប៉ុន្មានថ្ងៃខាងមុខ បន្ទាប់ពីនោះ បេសកជនអាមេរិក នឹងបញ្ជូនសំណើនេះទៅកាន់វិមានក្រឹមឡាំង មុនពេលរៀបចំកិច្ចប្រជុំបន្ថែមទៀតនៅសហរដ្ឋអាមេរិក នាចុងសប្តាហ៍ក្រោយ។

លោក Zelenskyy បានប្រាប់អ្នកយកព័ត៌មានថា សេចក្តីព្រាងផែនការសន្តិភាព ដែលពិភាក្សាជាមួយអាមេរិក អំឡុងពេលចរចានៅទីក្រុងប៊ែរឡាំង កាលពីថ្ងៃចន្ទគឺ «មិនល្អឥតខ្ចោះ» ទេ ប៉ុន្តែ «អាចដំណើរការបាន»។ ទោះយ៉ាងនេះក្ដី លោកក៏ព្រមានថា បញ្ហាសំខាន់ៗមួយចំនួន ជាពិសេសរឿងទឹកដីអ៊ុយក្រែន ដែលកាន់កាប់ដោយកងកម្លាំងរុស្ស៊ី នៅមិនទាន់ដោះស្រាយបាននៅឡើយទេ។

អ្នកនាំពាក្យវិមានក្រឹមឡាំង លោក Dmitry Peskov បានបញ្ជាក់ជាថ្មីម្តងទៀតនៅថ្ងៃអង្គារថា រុស្ស៊ីចង់បានកិច្ចព្រមព្រៀងសន្តិភាពដ៏ទូលំទូលាយមួយ មិនមែនជាបទឈប់បាញ់បណ្ដោះអាសន្នឡើយ ដោយព្រមានថា ប្រសិនបើអ៊ុយក្រែន ស្វែងរក "ដំណោះស្រាយបណ្តោះអាសន្ននិងមិនស្ថិតស្ថេរ នោះរុស្ស៊ីទំនងជាមិនត្រៀមខ្លួនចូលរួមទេ"។

ក្រុមមន្ត្រីអាមេរិក បាននិយាយកាលពីថ្ងៃចន្ទថា មានការឯកភាពពីអ៊ុយក្រែននិងអឺរ៉ុប លើប្រហែល ៩០% ហើយនៃផែនការសន្តិភាព ដែលតាក់តែងដោយសហរដ្ឋអាមេរិក។ ប្រធានាធិបតីអាមេរិក លោក Donald Trump វិញ ក៏បានសម្ដែងសុទិដ្ឋិនិយមថា “ឥឡូវនេះ ដំណោះស្រាយសន្តិភាព កាន់តែខិតជិតមកដល់ ជាងពេលណាៗទាំងអស់”៕