ក្រុមមន្ត្រីរបស់សហរដ្ឋអាមេរិក បាននិយាយកាលពីថ្ងៃអង្គារ (១៦ ធ្នូ) ថា យ៉ាងហោចណាស់ មនុស្សម្នាក់បានស្លាប់នៅរដ្ឋវ៉ាស៊ីនតោន ខណៈទឹកជំនន់យ៉ាងគំហុកបានវាយប្រហាររដ្ឋដ៏សំខាន់មួយនេះ ដែលជំរុញឱ្យមានបទបញ្ជាជម្លៀស សម្រាប់អ្នកស្រុកនៅតំបន់មួយចំនួន។

ការស្លាប់ដែលត្រូវបានរាយការណ៍ដំបូងគេនេះ គឺជាបុរសអ្នកបើកបរវ័យ ៣៣ឆ្នាំម្នាក់ ដែលបានស្លាប់ក្នុងយានយន្តមួយគ្រឿងដែល «លិចទឹកទាំងស្រុង» នៅព្រឹកថ្ងៃអង្គារ នេះបើយោងតាមទីភ្នាក់ងារពន្លត់អគ្គិភ័យរបស់តំបន់ Snohomish។

បទបញ្ជាជម្លៀស និងការព្រមានអំពីទឹកជំនន់យ៉ាងគំហុក កំពុងមានប្រសិទ្ធភាពសម្រាប់តំបន់ប៉ាស៊ីហ្វិក រដ្ឋវ៉ាស៊ីនតោន នៅថ្ងៃអង្គារ ដោយសារតែការបាក់ទំនប់ទឹកនៅលើទន្លេ White River។ កាលពីថ្ងៃចន្ទកន្លងទៅ ការបាក់ទំនប់ទឹកស្រដៀងគ្នានេះ បានកើតឡើងម្ដងរួចមកហើយនៅក្នុងតំបន់ King ជាយក្រុង Seattle ដែលក៏បានបង្កឱ្យមានការព្រមានពីទឹកជំនន់ និងបទបញ្ជាជម្លៀសផងដែរ។

លោក Bob Ferguson អភិបាលរដ្ឋវ៉ាស៊ីនតោន បាននិយាយកាលពីថ្ងៃអង្គារថា វិសាលភាពនៃការខូចខាតនៅក្នុងរដ្ឋនេះគឺធ្ងន់ធ្ងរណាស់ ប៉ុន្តែនៅមិនទាន់ច្បាស់លាស់ទេ បន្ទាប់ពីមានភ្លៀងធ្លាក់ខ្លាំង និងទឹកជំនន់ដ៏អាក្រក់បំផុតអស់ជាង ១សប្តាហ៍មកហើយ ខណៈអ្នកព្យាករព្រមានថា កម្រិតទឹកនឹងឡើងកាន់តែខ្ពស់ អាចមានបំណាក់ដី និងការដាច់ចរន្តអគ្គិសនីកាន់តែច្រើន៕